VOV4.Jarai - Ƀơi anăp kơ tơlơi tơnap tap amăng bruă sĭ mơdrô gơnam đang hmua amăng kual hơmâo klin Covid-19, blan 6 anai, Ding jum ngă hmua hăng pơđĭ kyar ƀon lan amra gum hrŏm hăng Khul pơlir hơbit đah kơmơi Việt Nam, Khul hlăk ai rơnuk Hồ Chí Minh pơjing hơdôm hơbô̆ bruă blơi pơhrui gơnam đang hmua brơi kơ neh met wa amăng kual hơmâo klin anai lĕ kiăng pơhlôm bruă bơwih ƀong rah pơgang klin rah. Hơdôm hơbô̆ bruă pơlir hơbit blơi pơhrui gơnam đang hmua hơmâo pơjing mơng gơnong glông truh pơ ƀon lan tơlơi să, phường. Mut hrŏm hơdôm hơbô̆ bruă pơlir sĭ mơdrô gơnam tam hơmâo wŏt Khul hơdôm anom bruă sĭ mơdrô amăng dêh čar Việt Nam. Gơnong bruă ngă hmua amra pơjing plang pơhing laih dong lăi pơthâo na nao amăng plang sĭ mơdrô kiăng kơ thâo tơring čar pơpă prap pơhrui gơnam đang hmua hăng gơnam pơhrui lu hă ƀŭ. Hơdôm plang pơhing sĭ mơdrô hluai tui tơlơi gơgrong prap lui rơdêh pơgiăng hyu gơnam tam, anih djă pioh, pơđom lui hăng kĭ pơkôl hăng hơdôm anom bruă blơi gơnam.

Siu Đoan: Pơblang