VOV4.Jarai - Mah phrâo pok pơhai, samơ̆ hơdôm hơbô̆ bruă rông sa trơ̆i mă tơkê mơda hăng rông brơi tuh hrôh ană ƀơi tơring glông Mang Yang, tơring čar Gialai ba glăi tŭ yua blung a. Hơbô̆ bruă anai djru brơi mơnuih ƀon sang, biă mă ñu lĕ hơdôm sang anŏ mơnuih djuai ania ƀiă pơplih tơlơi bơwih ƀong huă, hrưn đĭ amăng tơlơi hơdip mơda.

Ơi Vũ Văn Dân, dŏ ƀơi ƀut plơi 4, tơring kual Kon Dỡng lĕ sa amăng hơdôm boh sang anŏ amăng tơring glông Mang Yang, tơring čar Gialai arăng djru rông sa. Ơi Dân brơi thâo, sang anŏ ñu arăng djru 2 drơi sa rơnô hăng 1 drơi sa ania mơng blan 6 thun hlâo pioh rông. Hơmâo tơlơi gum djru mơng ƀing apăn bruă laih dong hrăm tui arăng, truh ră anai sa sang anŏ ñu rông tuh hrôh hăng dưi trơ̆i mă tơkê mơda.

Rông sa ƀơi anai ăt amuñ mơn, sa ƀong rok, hla mit, hla kơnung ia. Rĭm hrơi mơng mơguah rơngiă kơnong ha mơkrah mông đôč brơi sa ƀong. Bơ amăng bơyan hơjan rok bluh đĭ hiam kiăng kơ 10 mơnit đôč yuă rơk brơi kơ sa ƀong ha hrơi. Bơ lơ̆m sa bluh tơkê mơda ƀing gơmơi brơi ƀong wŏt kơtor, plum kiăng kơ tơkê bluh đĭ hiam. Kâo dŏ pơmĭn amra pok prong kiăng kơ sang anŏ dưi pơhrui glăi lu dong.

Bruă rông sa ƀơi tơring glông Mang Yang, Gialai

Mah phrâo pok pơhai, samơ̆ hơdôm sang anŏ lêng kơ hơmâo tơkê mơda pioh sĭ hăng hơmâo sa ania tuh hrôh. Sang anŏ ayong Nông Văn Đạo, dŏ ƀơi plơi Đê Bơ Tưk, să Đăk Jơ Ta, tơring glông Mang Yang lĕ sa anŏ ba jơlan hlâo. Tui hăng ayong Đạo, hlâo anun sang anŏ ñu rông bê, rơmô samơ̆ juăt klin tưp, nua sĭ đĭ trun na nao. Ayong Đạo brơi thâo rông sa dưi pơhrui glăi hơđong, lăp djơ̆ hăng kual lŏn mơnai ƀơi anai, biă mă ñu lĕ kual mơnuih djuai ania ƀiă hăng amra lĕ bruă bơwih ƀong sui thun pơ anăp kiăng neh met wa hơđong tơlơi hơdip mơda.

Sang anŏ gơmơi ăt bơni Kơnuk kơna mơn hơmâo đing nao djru bruă rông sa. Blung hlâo kâo ƀuh ba glăi tŭ yua biă mă, kar hăng sang anŏ gơmơi aka truh ha thun dưi trơ̆I 2 wŏt tơkê mơda hăng sa tuh hrôh dong ha drơi ană. Blung hlâo kâo ƀuh hơbô̆ bruă anai lăp djơ̆ sit nik hăng kâo čang rơmang tơdơi anai amra pok prong dong, rông lu tui kiăng kơ mơnuih ƀon sang hrăm hăng ngă tui.

Ơi Trần Nam Danh, Khua anom bruă bơwih ƀong huă - man pơdong anih anom tơring glông Mang Yang, tơring čar Gialai brơi thâo, hơbô̆ bruă rông sa hơmâo mă mơng rơnoh prăk tuh pơ alin mă yua boh thâo măi mok amăng tơring glông hăng ha bơnah rơnoh prăk mơng mơnuih ƀon sang. Hăng 5 boh sang aniŏ tơnap tap hơmâo arăng djru, hơbô̆ bruă blung hlâo ba glăi tŭ yua, djru brơi mơnuih ƀon sang hơđong tơlơi hơdip mơng bruă rông sa.

Lơ̆m pơphun ngă tui akŏ bruă anai ƀing gơmơi hơmâo pơlir hăng hơdôm anom bơwih ƀong hrŏm kiăng kơ lơ̆m ba sĭ tơkê amuñ brơi mơnuih ƀon sang. hăng amăng thun blan laih rơgao mơnuih ƀon sang hơmâo ngă tui hơbô̆ bruă anai klă hloh yua anun neh met wa hur har hăng rơkâo pok prong bruă rông sa kiăng kơ jai pơđĭ kyar amăng tơring glông.

Hăng tơlơi tŭ yua blung a mơ̆ hơbô̆ bruă rông sa trơ̆i mă tơkê mơda hăng  rông tuh hrôh djru brơi mơnuih ƀon sang ƀơi tơring glông Mang Yang pơplih tơlơi bơwih ƀong huă; biă mă ñu lĕ amăng kual mơnuih djuai ania ƀiă. Mơng anun, pơgôp pơtrut tañ bruă pơklaih mơng ƀun rin ƀơi tơring glông mơ̆ tơlơi hơdip kơ neh met wa dŏ lu tơnap tap kar hăng Mang Yang, tơring čar Gialai.

Hoàng Qui: Čih

Siu Đoan: Pơblang