VOV4.Jarai-Anom bruă wai lăng kyâo glai, Ding jum Đang hmua hăng Pơđĭ kyar plơi pla brơi thâo, rơnoh prăk sĭ mơdrô kyâo pơtâo blan 7 pơhrui glăi 1,41 klai dolar Mi, hrŏ trun 5,5% pơkă hăng blan 6 laih anun hrŏ 1,6% pơkă hăng tal anai mơ̆n thun hlâo. Mah hnun, yap abih 7 blan rơgao, rơnoh sĭ mơdrô gơnam kyâo pơtâo đĭ tui 1,3% pơkă hăng tal anai mơ̆n thun hlâo, rơnoh prăk pơhrui glăi abih tih 10,42 klai dolar Mi.

Amăng 7 blan rơgao, kyâo hăng gơnam pơkra ming mơ̆ng kyâo ba sĭ mơdrô ƀơi 110 boh dêh čar amăng rŏng lŏn tơnah. Amăng anun, anih sĭ mơdrô pơ dêh čar Mi, Japan, Khač, Khul pơlir hơbit Mi kô̆,  Hàn Quốc ăt jing anih sĭ mơdrô phun, truh 90% rơnoh prăk sĭ mơdrô hăng tač rơngiao dêh čar ta. Kơnong anih anom sĭ mơdrô pơ dêh čar Mi, jing anih sĭ mơdrô prong, blơi kyâo pơtâo mơ̆ng dêh čar ta hrŏ hĭ 4,9% pơkă hăng tal anai thun hlâo, yua anun ngă kơ hnong pơđĭ kyar aka lăp ôh mơ̆ng akŏ thun truh ră anai.

Nay Jek: Pơblang