VOV4.Jarai - Tui hăng Ding jum bruă hmua hăng pơđĭ kyar plơi pla, amăng 9 blan laih rơgao, prăk pơhrui glăi mơng bruă sĭ gơnam mơng hmua kyâo akan hơdang him lăng hơmâo 40 klai 800 klăk dolar Mi, đĭ 15,2%. Tui anun, nua gơnam mơng hmua, kyâo, akan hơmâo ba sĭ pơhrui năng ai 6 klai 900 klăk dolar Mi, lu hloh 2 wơ̆t pơhmu hăng tơđar thun hlâo. Yap abih tih amăng 9 blan, gơnam mơng hmua phun, kyâo juăt ba sĭ hăng akan hơdang lêng kơ đĭ soh. Truh mông anai, gah bruă hmua hơmâo 7 mơta gơnam, grup gơnam tam hơmâo nua sĭ kơ dêh čar tač rơngiao rơbêh 2 klai dolar Mi anun lĕ kơphê, kơsu, braih, boh troh, añăm pơtăm, boh ñông, hơdang, hơdôm gơnam pơkra mơng kyâo. Lu gơnam yôm hơmâo ba sĭ lu hloh kơ thun hlâo kah hăng: kơphê, kơsu, braih, tiu, hơbơi plum, hăng gơnam pơkra mơng tơpung hơbơi plum, akan tra, hơdang hăng gơnam pơkra mơng kyâo...Amăng anun, sa dua mơta gơnam đĭ kyar yua hơmâo nua pơmă kah hăng kơphê đĭ giăm 22%, tiu đĭ rơbêh 30%...Kơ anih blơi gơnam, dêh čar Mi ăt jing dêh čar ƀing ta ba sĭ gơnam lu hloh mơn, hơmâo rơbêh 10 klai 500 klăk dolar Mi, kiăo tlôn lĕ dêh čar Khač, Japan, Hàn Quốc...

Siu H’Mai: Pơblang