VOV4.Jarai-Sa amăng hơdôm pơkă tui hăng Hră pơtrun mrô 19 mơ̆ng Jơnum lok 5 Khua mua apăn bruă ping gah dêh čar tal XIII kơ bruă ngă hmua, djru mơnuih ngă hmua, kual plơi pla truh thun 2030, lăng nao pơ anăp adih thun 2045, anun lĕ tơlơi phiăn dêh čar, jơlan hơdră kơnuk kơna pioh kơ bruă ngă hmua, djru mơnuih ngă hmua, kual plơi pla. Amăng anun, hơmâo lăi nao ăt pioh lu rơnoh prăk brơi čan djru kơmlai, pơtrut pơsur čan ling tuh pơ alin kơ bruă ngă hmua, djru mơnuih ngă hmua, kual plơi pla; djru prăk kơ khul ngă ƀong hrom čan, sang anŏ mơnuih ƀôn sang dŏ pơ plơi pla pơđĭ kyar bơwih ƀong huă sĭ mơdrô pơkra ming, djru sang bruă sĭ mơdrô, sang anŏ mơnuih ngă hmua sĭ mơdrô….Tui hăng hră pơtrun mrô 29, sa wơ̆t dơ̆ng lăi pơtong tơlơi gơgrong brơi čan prăk kơ djop sang anŏ ngă hmua, boh nik ñu sang anŏ ƀun rin hăng sang anŏ kơnuk kơna lăng ba; pơgăn bruă ngă soh glăi hyu čan prăk ƀing mă kơmlai lu hăng pơsir khut khăt tơlơi brơi čan tă tăn kơmlai lu.

Lăng glăi pơkôl jơlan nao găn rơgao 34 thun akŏ pơjing hăng pơđĭ kyar, hơmâo tơlơi djru hrom mơ̆ng Agribank hăng tơlơi gơgrong phun amăng anih sĭ mơdrô, čan prăk hăng gơgrong anăn čan prăk ngă hmua, djru mơnuih ngă hmua, kual plơi pla, sang bruă prăk yơh glăm ba bruă phun tuh pơ alin kơ “Klâo bơnah ngă hmua” Tam nông, yap truh 70% rơnoh prăk čan bơwih ƀong huă, hơmâo rơnoh lu hloh amăng anih brơi čan prăk tuh pơ alin kơ bruă ngă hmua, kual plơi pla ƀơi Việt Nam sa bruă mă yôm pơphăn kơ tơlơi bơwih ƀong huă, kơđi čar hăng mơnuih mơnam. Yua hơmâo prăk čan mơ̆ng Agribank, bruă ngă hmua hăng kual plơi pla pơblih phrâo lu biă mă, lui hĭ hơdră ngă hmua sa hnong hơđăp, pơblih hơdră ngă hmua laih anun mơnuih ngă hmua jing ƀing gơyut ngă hrom mơ̆ng Agribank jai hrơi đĭ kyar, thâo hrưn mă pơklaih ƀun rin ư̆ rơpa hăng hrưn đĭ ngă pơdrong amăng kual lŏn plơi pla anih ta pô dŏ mơtam.

Hăng tơlơi gơgrong ngă bruă bơwih brơi pơđĭ kyar bruă đang hmua, mơnuih ngă hmua, kual plơi pla, Agribank pô ba jơlan hlâo, jing sang bruă prăk phun pok pơhai tŭ yua lu hơdră brơi čan prăk kơnuk kơna, 2 hơdră bruă tui anŏ pơkă mơ̆ng dêh čar man pơdong plơi pla phrâo hăng pơhrŏ ƀun rin hơđong kjăp. Ră anai, Agribank djru brơi 200 mơta gơnam bơwih brơi kơ sang bruă prăk hăng anŏ gêh găl, pơgôp hrom klă anih anom sĭ mơdrô tla prăk kăk ƀu yua prăk mơta ôh, kiăng pơđĭ tui bruă mă bơwih bơwang mơ̆ng sang bruă prăk hăng atur tơlơi bơwih ƀong huă, biă mă ñu amăng kual ngă hmua, kual plơi pla. Rơbêh 34 thun rơgao pơđĭ kyar, Agribank hơmâo djă hnong pơđĭ kyar hơđong na nao, man pơdong đĭ tui, pơblih hơdră mă bruă ba glăi boh tŭ yua. Yap truh blan 6/2022, rơnoh prăk Agribank pơhrui glăi rơbêh 1,62 klăk klai prăk, prăk čan bơwih ƀong huă rơbêh 1,39 klăk klai prăk.

Amăng anun, prăk čan kơ bruă ngă hmua plơi pla rơbêh 896 rơbâo klai prăk, dưm dưm hăng 70% rơnoh prăk čan. Hăng atur prăk kăk kjăp hơđong, sang bruă prăk anai ăt ngă hrom mơnuih ƀôn sang ngă hmua amăng djop tơring tơrang amăng dêh čar, ngă djop na nao rơnoh prăk brơi čan, bơwih brơi ngă hmua pla pơjing hăng sĭ mơdrô. Hrom hăng anun, pơhrui djop rơnoh prăk, hăng lu hơdră mă bruă pơblih phrâo tŭ yua, djơ̆ găl kơ rĭm črăn pơđĭ kyar tum teč, Agribank djru mơnuih ƀôn sang, boh nik ñu kual ataih, kual tơnap tap amuñ hloh dưi tŭ mă čan prăk kiăng pơplai kơ bruă mă, pơđĭ tui tơlơi hơdip mơda hăng pơtrut sĭ mơdrô, djru lom lui hĭ bruă brơi čan tă tăn mă kơmlai lu. Ƀơi anăp jơlan yak nao phrâo mơ̆ng bruă ngă hmua lăi pha laih anun atur tơlơi bơwih ƀong huă amăng dêh čar hnun mơ̆n, mah bưp lu tơlơi tơnap tap, lông lăng, khua mua sang bruă prăk Agribank lăi pơtong, sang bruă prăk khut khăt kiăo tui jơlan pơđĭ kyar Klâo bơnah ngă hmua, ƀu pơdơi ôh tơlơi gir run hrom hăng kơnuk kơna, sang bruă prăk djru bruă ngă hmua Agribank, ăt pơjing rai bruă mă pơblih kơtang phrâo amăng bruă djru ba tơlơi hơdip mơda kơ mơnuih ƀôn sang, boh nik ñu mơnuih ngă hmua hăng pơđĭ kyar bruă ngă hmua, plơi pla phrâo amăng dêh čar ta rơnuk phrâo ră anai. Amăng bruă mă pơđĭ kyar mơ̆ng pô, hơdôm tơhnal pơtrun prong dưi hơmâo Agribank pơtong glăi hlâo hloh lĕ: Kơsung  nao ngă tui djơ̆ jơlan hơdră, tơlơi pơtrun mơ̆ng Ping gah, kơnuk kơna; Ăt djă bong kjăp tơlơi glăm ba phun, pran kơtang amăng anih sĭ mơdrô prăk kăk kơ kual plơi pla, jing pô ngă hrom tong ten, đăo kơnang mơ̆ng mơnuih ngă hmua, kual plơi pla.

Ƀu pơdơi ôh pok prong bruă mă, glông bruă Agribank hrưn đĭ truh pơ kual ataih, kual asuek, anih ngă hmua, plơi pla dŏ ataih amăng dêh čar kiăng ngă tui hmao kru djru prăk mơnuih ƀôn sang čan hăng mă yua anŏ bơwih bơwang yua prăk kăk mơ̆ng sang bruă prăk kơ mơnuih ƀôn sang amăng dêh čar dêh čar….Kiăo tui tong ten tơlơi git gai mơ̆ng kơnuk kơna hăng Sang bruă prăk gah bruă ngă hmua, Agribank krăo lăng na nao tơlơi pơhing, bruă hơmâo, tơlơi truh klin kheng lŏn adai ngă, laih dơ̆ng pok pơhai sit nik, tŭ yua hơdôm hơdră djru tuai čan prăk bơbeč yua mơ̆ng klin Covid 19 ngă, tơlơi truh pơkŏn ƀu dưi thâo hlâo, ngă sat kơ bruă đang hmua pla pơjing....

Hrom hăng anun, Agribank ăt amra ngă gêh găl kơ tuai hơmâo tơlơi truh tơnap tap amăng bruă ngă hmua, pơkra ming, sĭ mơdrô, boh nik ñu anom bruă sĭ mơdrô anet hăng man ƀrô, anom bruă sĭ mơdrô gah đang hmua bơbeč djơ̆ kơtang mơ̆ng Covid 19 ngă laih anun anom bruă sĭ mơdrô hơmâo bruă git gai wai lăng klă, dưi rŭ glăi tañ bơwih ƀong huă sĭ mơdrô; mă bruă beč bal, prăp lui tong ten, sem glăi na nao kiăng hơmâo hơdră djơ̆ găl kơ rĭm pô čan, tuai čan prăk bơwih ƀong huă sĭ mơdrô djop mông găl.

Nay Jek: Pơblang