VOV4.Jarai - Mơguah lơ 1/7, ƀơi ƀôn prong Cần Thơ, Ding jum đang hmua hăng pơđĭ kyar ƀôn sang dêh čar ta pơphun Jơnum bơkơtuai “Pơtrut sĭ gơnam mă mơng đang hmua akan hơdang kual lŏn dăo ia krông Cửu Long kơ kual Mi Kô̆”. Truh ră anai, EU lĕ jing sa amăng 4 anih anom sĭ gơnam mă mơng đang hmua akan hơdang prong mơng Việt Nam hăng EU ăt lĕ sa amăng 3 bôh anih anom blơi gơnam mă mơng đang hmua akan hơdang prong hloh rŏng lŏn tơnah.

Anih anom dô̆ bơkơtuai

Việt Nam ăt lĕ sa amăng 4 bôh dêh čar kual Mi Kô̆ kĭ pơkôl pơkă sĭ mơdrô mơ-ăk klă hăng EU. Yua anun, tơhnal gal pioh mă yua anih anom sĭ mơdrô ƀơi EU prong biă, djru đĭ tui nua gơnam hăng prăk pơhrui glăi, pơjing anăn kơ gơnam mă mơng đang hmua tui jơlan gah gơgrong, rơđah, kơjăp, djru pơplih tơlơi pơmin mơng “Ngă đang hmua hơdai nao bơwih ƀong sĭ mơdrô gơnam mă mơng đang hmua”. Tơhnal pơkă truh thun 2030 nua gơnam mă mơng đang hmua akan hơdang sĭ kơ EU hmâo mơng 7 klai 500 klăk truh kơ 8 klai dolar Mi, mrô gơnam sĭ hmâo pơkra kơ EU hmâo năng ai ñu ha mơkrah hăng ƀơi anăp truh glông jơlan gơnam tŭč rơnŭč ƀơi EU hmâo 30%./.

Siu H’ Prăk: Pơblang