Tui hăng tơlơi pơhing ƀơi mông jơnum, 9 blan rơgao, tơlơi pơhing ngă hmua pla pơjing, ming pơkra gơnam sĭ mơdrô, tuh pơ alin, man pơdong čuk pơkra jơlan laih anun sĭ mơdrô hăng tač rơngiao ƀơi Dak Lak, Dak Nông hăng Lâm Đồng lêng kơ hơđong soh đôč, lu tơhnal pơkă đĭ tui pơhmu hăng tal anai mơ̆n thun hlâo. Kơnong tơring čar Lâm Đồng rơnoh pơđĭ kyar bơwih ƀong huă hơmâo tơhnal pơƀuh rơnang hĭ. Abih 3 boh tơring čar lêng kơ bưp tơlơi tơnap tap soh, yua gun pơdjơ̆ nao kơ bruă djru lŏn dŏ, lŏn ngă hmua brơi kơ mơnuih ƀôn sang djuai ƀiă tui hăng Hơdră mơ̆ng dêh čar pơkă laih anun tơlơi mơnuih ƀôn sang đuăi hyu dŏ ƀu djơ̆ akŏ bruă……

Tui hăng Khua ding jum ơi Nguyễn Văn Hùng, boh tơhnal dưi ngă amăng 9 blan rơgao brơi ƀuh 3 boh tơring čar Dak Lak, Dak Nông hăng Lâm Đồng hơmâo lu tơlơi gir run laih, boh nik ñu amăng bruă ngă hmua. Khua ding jum ơi Nguyễn Văn Hùng rơkâo 3 boh tơring čar pơtum ngă giong tơhnal pơkă bruă mă thun 2024. Amăng anun, djop tơring glông pơtrut hmar bruă yua prăk tuh pơ alin kơ bruă čar, ngă giong hơdôm ring bruă, kơčăo bruă tuh pơ alin kơ bruă čar; đing nao lu hloh kơ bruă pơgang rơnuk rơnua hơđong dêh čar; djă pioh gru hăng pơđĭ kyar gru grua hiam, gum hrŏm pơđĭ kyar lu mơta gru grua hiam pơtlep hăng bruă čơkă tuai hyu ngui.