VOV4.Jarai-Boh troh gơnam mơ̆ng đang hmua lĕ gơnam sĭ mơdrô phun mơ̆ng Gia Lai, hăng rơnoh sĭ mơdrô juăt pơhrui glăi truh 500 klăk USD rĭm thun hăng đĭ tui na nao. Tơlơi anai, hơmâo yua lu thun rơgao, tơring čar gleng nao kơ bruă čih dăp hơdră, pok pơhư prong kual pla pơjing ngă đang hmua tui hăng tơhnal pơkă. Tui hăng tơlơi lăi pơthâo mơ̆ng Gơnong bruă Ngă hmua hăng Pơđĭ kyar plơi pla Gia Lai, ră anai đơ đam pla pơjing truh 557 rơbâo 700 ha.

Kơphê yơh sa amăng hơdôm boh čroh sĭ mơdrô phun ƀơi Gia Lai

Amăng anun, hơmâo 230 rơbâo ha, dưm dưm hăng 41% đơ đam lŏn, dưi ngă tui hơdră VietGap, GlabalGap, 4C, Organic, Rainforest Alliance. Ơi Lưu Trung Nghĩa Khua Gơnong bruă ngă hmua hăng pơđĭ kyar plơi pla Gia Lai brơi thâo, hơdôm mơta gơnam kah hăng kơphê, boh kruăi hrĕ tơring čar ba nao sĭ pơ dêh čar Japan, EU. Tui hăng akŏ bruă, mơ̆ng thun 2022-2025, tơring čar amra pơđĭ tui đơ đam ngă hmua pla pơjing tui hăng hơdră tŭ mă wai lăng 5 rơbâo ha rĭm thun, pơđĭ tui boh tŭ yua mơ̆ng đang hmua sĭ mơdrô hăng tač rơngiao, pơđĭ tui hnong pơhrui glăi kơ mơnuih ngă hmua.

Nay Jek: Pơblang