VOV4.Jarai - Ƀơi tơring čar Dak Lăk hơdôm rơtuh ektar đang hơbơi čên truh bơyan buč laih. Samơ̆, pô pla ƀu suk dŏ dong ƀong huă ôh yua dah nua hơbơi čên rơgêh đơi samơ̆ ƀu hơmâo pô blơi.

Sang anŏ ayong Nguyễn Ngọc Ánh (dŏ ƀơi plơi Mê Linh 2, să Buôn Triết, tơring glông Lăk, Dak lăk) thun anai hơmâo pla rơbêh 7,5 ektar đang hơbơi čên. Ñu bơngơ̆t kơ hơbơi čên truh bơyan buč laih samơ̆ nua trun kơtang biă, dŏ glăi mơng 4 truh 5 rơbâo prăk đôč lơ̆m 1 kg, hnun hai ƀu hơmâo pô blơi mơn. Tui hăng tơlơi jŭ yap mơng ayong Ánh, hăng nua sĭ tui anai, bơyan hơbơi thun anai amra rơngiă rơbêh 700 klăk.

“Tui hăng rim thun nua rơgêh mơn samơ̆ ăt hơmâo mơn mơng 7 truh 8 rơbâo lơ̆m sa kg, ană plơi sĭ ăt hơmâo ƀong lơi mơn ƀiă. Bơ thun anai ƀing hyu mơdrô tŭ kơ lăi gơñu ƀu blơi dong tah. Thun anai ană plơi bơngơ̆t biă yơh, yua dah ƀu dưi tla prăk apah hmua arăng, aka ƀu yap ôh prăk ngă hmua, blơi kmơk, apah arăng mă bruă dong.

Kar kăi mơn, ayong Trần Văn Thanh, dŏ ƀơi ƀuôn Triá, tơring glông Lăk ăt pla rơbêh 5 ektar đang hơbơi čên, prăk tuh pơ plai 500 klăk prăk, samơ̆ thun anai kah hăng rơngiă soh sel:“Hơbơi čên giăm 5 blan laih samơ̆ ƀu hơmâo pô blơi, hyu sĭ tơnap, nua rơgêh. Ră anai hơmâo lu mơnuih či lui hĭ hơbơi čên, bơ ta lui hĭ hơ-ưi mơn, bơ ta sĭ, pơƀut glăi lăng rơngiă lu prăk mơn. Ngă hơbơi čên rơngiă prăk hloh kơ ngă pơdai mơng 2 truh 3 wơ̆t. Thun anai, lơ̆m sa ektar rơngiă soh sel mơng 100 truh 500 klăk prăk ƀơ̆i”.

Hơdôm rơtuh ektar đang hơbơi čên ƀơi Dak Lăk aka ƀu hơmâo pô blơi

Mơnuih pla hơbơi čên bơngơ̆t lơ̆m nua hơbơi trun samơ̆ ƀu hơmâo pô nao tơña blơi

Bơ ayong Trần Văn Nghĩa, dŏ ƀơi să Quảng Điền, tơring glông Krông Na thun anai ăt apah mă lŏn arăng mơn či pla 5 ektar đang hơbơi. Lu wơ̆t hrơi tơjuh laih ñu iâu arăng nao blơi samơ̆ ƀu hơmâo pô blơi ôh.

“Rim thun truh bơyan buč hơbơi arăng hyu ĕp mă tơl anih, samơ̆ thun anai truh bơyan buč hơbơi laih samơ̆ arăng ƀu nao blơi ôh. Gơmơi iâu nao laih samơ̆ gơñu ƀu nao blơi ôh yua aka ƀu hơmâo anih blơi glăi mơng ƀing gơñu anun jing tơnap biă mă. Thun anai, rơngiă prăk laih, thun tơdơi anai ƀing gơmơi khŏm sem lăng laih bruă pla, pơdjuai phun pơkŏn dong bĕ, tui anai hiư̆m thâo hơdip”.

Ơi Đoàn Văn Trường dŏ ƀơi plơi prong Buôn Ma Thuột, sa čô mơnuih juăt hyu mơdrô hơbơi čên ƀơi hơdôm boh tơring čar kual Dap Kơdư ba sĭ kơ čar rơngiao brơi thâo: Mơng rơnuč blan 4 truh ră anai, hơbơi čên lu đơi anun ngă nua trun na nao. Ƀing hyu mơdrô mơng dêh čar Khač blơi mă amăng aset đôč anun ngă nua trun tui.

“Ră anai anih sĭ mơdrô jing pơdơi hĭ laih. Ƀing gơmơi ƀudah lu mơnuih blơi hơbơi čên pơkŏn ƀu thâo ngă hiư̆m pă hăng mrô hơbơi anai. yua dah hơbơi čên ră anai dŏ glăi lu biă. Ăt hơmâo mơn lu sang anŏ iâu gơmơi nao blơi samơ̆ gơmơi aka ƀu hơmâo anih ba sĭ, ƀu thâo krăn arăng blơi hă ƀŭ, anun jing ƀu thâo nao blơi hơbơi čên mơng neh met wa ôh”.

Tui hăng mrô jŭ yap mơng Anom bruă tơjŭ pla hăng pơgang phun pla (Gơnong bruă ngă hmua hăng pơđĭ kyar plơi pla tơring čar Dak Lăk) tar ƀar tơring hơmâo năng ai 2.500 ektar đang hơbơi čên. Amăng anun, kơnong tơring glông Lăk hơmâo truh 1.200 ektar đang hơbơi čên. Ơi Nguyễn Viết Quang, Khua anom bruă hmua hăng pơđĭ kyar ƀon lan tơring glông Lăk brơi thâo: Ră anai dŏ rơbêh 500 ektar đang hơbơi čên mơng neh met wa aka ƀu buč ôh yua ƀu hơmâo mơnuih blơi.

“Ră anai anom bruă ngă hmua hăng pơđĭ kyar ƀon lan ngă hrŏm hăng hơdôm boh să Buôn Tría, Buôn Triết pơhiăp tom ƀing hyu mơdrô, anom bơwih ƀong blơi hơbơi čên djru neh met wa. Anom bruă ngă hmua hơmâo laih hră pơ-ar git gai hơdôm boh să pơtô brơi neh met wa kiăng pla hơbơi čên kiăo tui mrô pơkă mơng anom bruă đôč”.

Tuấn Anh: Čih - Siu H’Mai: Pơblang