VOV4.Jarai-Klin pơtah čroh mơ̆ng kual ơi jŭ ƀă ƀơi un, bui hơmâo glăi dơ̆ng ƀu thâo abih ƀơi tơring čar Dak Lak, giăm truh 60 anih hơmâo klin dưi ƀuh mơ̆ng akŏ thun truh ră anai.. Dua bit anih ƀă klin phrâo ƀơi Dak Lak lêng kơ sang anŏ čem rông un, bui ƀơi să Ea Tul hăng să Čư̆ Mgar, tơring glông Čư̆ Mgar,  tơring čar Dak Lak hơmâo 10 drơi un ƀă. Hơdôm drơi un ƀă klin anom bruă kơnuk kơna ba čuh pơrai abih laih. Yap mơ̆ng akŏ thun truh ră anai, đơ đam tơring čar Dak Lak hơmâo čih pioh 59 bit anih hơmâo klin ƀă hyu ƀơi 52 boh plơi pla ala ƀôn, mơ̆ng 8 boh tơring glông.

Mơnuih rông un ƀơi Dak Lak pruih ia jrao pơdjai kman drông un ƀă klin

Abih bang mrô un bui ƀă klin truh kơ 400 drơi hăng pơkă abih bang truh 24 tơn. Amăng anun, tơring glông Čư̆ Mgar hơmâo 158 drơi un khom čuh pơrai lui, abih bang truh11 tơn. Ơi Nguyễn Quang Đức, Khua sang bruă wai lăng bruă čem rông hlô mơnong hăng anom bruă pơjrao hlô mơnong tơring glông Čư̆ Mgar, brơi thâo: Ră anai, anom bruă pơjrao hlô mơnong ngă hrom anom bruă gong gai kơnuk kơna tơring glông krăo lăng tong ten anih hơmâo klin hăng pơtrun hiăp kơ mơnuih ƀôn sang ƀu dưi sĭ mơdrô un djơ̆ klin kiăng huăi hlin ƀă hyu pơ anih pơkŏn.

Nay Jek: Pơblang