VOV4.Jarai - Ping gah tơring čar Dak Lăk phrâo ngă hrŏm hăng Sang bruă Kơđi čar Dêh čar Hồ Chí Minh pơphun jơnum Boh thâo hăng anăn “Tơring čar Dak Lăk pơƀut pơđĭ kyar ngă hmua klă, hơđong kơjăp”.

Ƀơi mông jơnum, ƀing rơgơi kơhnâo, mơnuih wai lăng lăi pơthâo tơlơi ba bơkơtuai hăng lu tơlơi kah hăng: Tơlơi pơmin mơng Ping gah, tơlơi phiăn mơng Kơnuk kơna kơn pơđĭ kyar ngă hmua klă, hơđong kơjăp; jơlan hơdră ngă bruă mơng Dak Lăk kơ pơđĭ kyar ngă hmua klă, hơđong kơjăp; Mă yua boh thâo sinh học amăng pơđĭ kyar ngă hmua ƀơi tơring čar Dak Lăk; tơlơi gêh gal hăng tơlơi lông amăng bruă ngă hmua ƀơi Dak Lăk tui jơlan kiăng klă, hơđong; sa, dua bruă hăng hơdră pơsir gah kĭ thuâ̆t pơđĭ kyar ngă hmua hơđong kơjăp tui jơlan sem lăng anih pla djuai phun pla yôm hloh ƀơi Dak Lăk; Tơlơi hơmâo sit biă ñu hăng hơdră pơđĭ kyar boh thâo pơkra kyâo tơring čar Dak Lăk...

Tui hăng Nai tha prin Võ Văn Lợi, Khua anih pơtô bruă Bơwih ƀong, Sang hră kơđi čar kual 3, Dak Lăk hăng tơlơi gêh gal hơmâo rơbêh 650.000 ektar lŏn ngă hmua, amăng anun hơmâo rơbêh 300.000 ektar lŏn mriah bazan hiam, ayuh hyiăng djơ̆ lăp mơn, Dak Lăk amuñ pơđĭ kyar ngă hmua pơlir hăng bruă ba sĭ gơnam, pơƀut lŏn tơnah pioh pơđĭ kyar bơwih ƀong ngă hmua.

“Ƀing ta kiăng khŏm hơmâo bruă ngă pơđĭ tui anŏ yôm mơng gơnam, hluai tui bruă pơtruh nao rai mă yua hơdôm tơlơi gêh gal, anun lĕ tơlơi gêh gal blung a. Mơng bruă pơtruh nao rai, kiăo tui anŏ yôm mơng gơnam ƀing ta jing plai ƀiă hơmâo tơlơi rơngiă gơnam, prăk kăk, pơhlôm ba glăi anŏ klă. Kiăng bĕ tơlơi ƀu klă, bĕ hĭ tơlơi lông lĕ ƀing ta khŏm ngă hrŏm”.

Mông jơnum

Tui hăng Ping gah tơring čar Dak Lăk, pơđĭ kyar ngă hmua klă, hơđong kơjăp lĕ sa amăng 6 mơta bruă yôm phun pơđĭ kyar bơwih ƀong huă mơng tơring čar, hơmâo lăi nao ƀơi tơlơi pơtrun Jơnum ruah khua ping gah tơring čar tal 17, rơwang thun 2020-2025. Khă hnun, ƀu dưm kơnar amăng bruă pơkra gơnam pơjing nua, aka ƀu pơhưč arăng tuh pơ plai bruă ngă hmua tui boh thâo phrâo...glăk jing pơgăn hĭ bruă hmua ƀu pơđĭ kyar tui hăng ƀing ta kiăng.

Mơng tơlơi hơmâo sit nik ƀơi tơring čar, ơi Nguyễn Quang Hà, Khua jơnum min mơnuih ƀon sang tơring glông Ea Hleo lăi, tơlơi ngă gun amăng bruă hmua Dak Lăk ră anai tơbiă mơng hơdôm bruă dưm dăp pơkă hơnong. Sit hnun yơh kiăng lăng ba hloh bruă dưm dăp ngă hmua hlâo či lăi nao hơdră pơsir pơkŏn:

“Mơng hlâo laih bruă pơhrui gơnam hơmâo samơ̆ nua rơgêh, mơnuih ƀon sang dơnong kiăo tui tơlơi kiăng mơng anih sĭ mơdrô đôč yơh, lăng anŏ ƀơi thơ hơmâo nua lĕ luh nao pla. Tơlơi anun hơmâo lĕ yua ƀing ta prăp lui bruă ngă hmua ƀu klă. Hơdră pơsir hĭ tui kâo kiăng lĕ ƀing ta kiăng ngă klă bruă dưm dăp prăp lui, pơplih ming kiăng lăp djơ̆ tui rim kual, djơ̆ hăng djuai phun pla đah mơng pơhrui glăi hơmâo hloh amăng 1 blah đang hmua”.

Ƀing khua nao lăng anih pơdă gơnam mơng hmua hmư̆ hing ƀơi Dak Lăk

Ƀơi mông jơnum, rơngiao kơ hơdôm tơlơi pơgôp hiăp anăp nao sa bruă ngă hmua hơđong, ƀing khua hơmâo lăi nao hơdră pơđĭ kyar ngă hmua hăng boh thâo phrâo kah hăng hla tui boh thâo kĭ thuâ̆t, pơhưč tuh pơ plai, mă yua anŏ gêh gal mơng rơnuk boh thâo phrâo 4.0. Mơng anun hơmâo tơlơi dưm kơnar, pơplih phrâo prong, dưi djru Dak Lăk pơđĭ kyar ngă hmua klă, hơđong kơjăp, dưi pơđĭ kyar “Ngă hmua hơdjă, ngă hiam anih anom, plơi pla pơplih phrâo, mơnuih ƀon sang hơdip hiam”.

Ơi Phạm Minh Tấn, Kơ-iăng khua Ping gah tơring čar Dak Lăk brơi thâo: Tơlơi pơtrun Jơnum ping gah tơring čar tal 17, rơwang thun 2020-2025 pơsit pơđĭ kyar ngă hmua klă, kơjăp. Anai lĕ sa amăng 6 mơta bruă yôm phun kiăng pơđĭ kyar bơwih ƀong mơng Dak Lăk. Yua hnun, tơlơi bơwih ƀong pơplih klă hloh, pơđĭ kyar rim thun hơmâo 8,5%. Ngă hmua pơƀut pơđĭ kyar tui jơlan pơđĭ tui mrô gơnam pơhrui, anŏ klă djơ̆ hăng tơlơi kiăng mơng anih sĭ mơdrô, blung a hơmâo pơtrut tui laih tơlơi gêh gal mơng tơring čar. Kiăng akŏ pơdong bruă ngă hmua tui rơnuk phrâo, hơđong kơjăp, tơring čar glăk pơƀut tuh pơ plai hăng pơhưč tuh pơ plai amăng bruă anai.

Siu H’Mai: Pơblang