Tui hăng anun, 9 blan laih rơgao, rơnoh pơhrui glăi prăk kơnuk kơna tơring čar Dak Lak hơmâo 6.200 klai, dưi ngă djop 90% pơkă hăng rơnoh mơ̆ng gơnong dlông jao, đĭ tui 12% pơkă hăng tal anai thun 2023. Kơnong prăk duh jia hăng prăk apah yau gah anom bruă duh jia pô pơhrui hơmâo 94% rơnoh jao. Hơdôm rơnoh prăk pơhrui glăi pơkŏn lêng kơ đĭ ƀiă soh kah hăng: prăk duh jia yua lŏn, prăk apah pơgang ayuh hyiăng, anih dŏ jum dar, prăk pơhrui glăi mơ̆ng bruă sĭ mơdrô gah anom bruă rơngiao kơnuk kơna, prăk duh jia mơ̆ng sang bruă sĭ mơdrô hơmâo prăk dêh čar tač rơngiao tuh pơ alin.

Ơi Phạm Thanh Long, Kơ-iăng Khua Anom bruă wai lăng jia tơring čar Dak Lak brơi thâo, kiăng dưi hơmâo boh tơhnal anai, anom bruă gơñu pok pơhai ngă tui sa amăng plĕ, khut khăt pơtrut tui lu hơdră kiăng pơhrui djop prăk duh jia, pơgăn bruă duh jia ƀu djop, dong hnưh. Laih dơ̆ng ngă tui mơta bruă pơtô lăi tơlơi phiăn kơnuk kơna phrâo kơ duh jia; ba yua boh thâo ia rơgơi tơlơi pơhing, pơtrut pơblih hơdră ngă hră pơar, pơhrui jia, kơnang kơ ia rơgơi mrô.