-Ơ ơi, Dak Lak lĕ tơring čar hlăk hơmâo rơnoh hla kyâo gôm ƀiă hloh ƀơi kual Dap Kơdư laih anun ƀiă hloh amăng dêh čar. Anai lĕ, yua bruă wai pơgang glai rưng aka đing nao lăp djơ̆ hnun kơlĕ?

-Ơi Nguyễn Quốc Hưng: Dak Lak lĕ hnơng gôm tơ-ui mơ̆ng hla kyâo pơtâo ƀiă yua kơ lŏn dăo, hiam hloh ƀơi kual Dap Kơdư. Wơ̆t hăng lŏn pơ tơring glông Ea Sup ƀu djơ̆ lŏn drơ̆t mriah Bayan ôh, samơ̆ lŏn dăo hăng bruă ngă hmua gêh găl hloh. Hrŏm hăng anun, mơnuih ƀôn sang đuăi hyu dŏ raih daih, hyu dŏ amăng glai klô lu lĕ pơ Dak Lak yơh lu, ră anai gơñu bưp lu tơlơi tơnap tap biă mă. Kiăng hơmâo tơlơi hơdip mơda lĕ khom čong jơnah jah glai ngă hmua. Dua lĕ bruă mă pla kyâo glai ră anai, prăk kơnuk kơna tuh pơ alin ƀu hơmâo ôh. Kơnong prăk tla kơ bruă pla pơhrua glai klô pơblih yua lŏn glai. Hơmâo rơnoh prăk aset đôč, anun yơh đơ đam pla kyâo glai ƀu lu ôh. Prăk tuh pơ alin ƀu hơmâo, akŏ bruă ODA ăt ƀu hơmâo lơi, tuh pơ alin kơ bruă pla kyâo glai mơ̆ng rơnoh prăk čan FDI ƀu hơmâo. Kiăng pơđĭ kyar bruă pla kyâo glai tơnap tap biă mă yơh.

-Dak Lak hơmâo hơdôm hơpluh boh kông ty, sang bruă wai lăng glai, bruă wai lăng lŏn glai kông ngăn prong, giăm 220.000 ha. Bruă arăng pơđĭ kyar pla kyâo hăng pơgang glai klô hiư̆m lĕ, ơ ơi ?

-Ơi Nguyễn Quốc Hưng: Pla kyâo glai ră anai kơnang nao kơ hơdôm kông ty, plah anom bruă wai lăng kyâo glai hăng mơnuih ƀôn sang samơ̆ jơlan hơdră djru hrŏm ƀu sa hnơ̆ng ôh. Lu plah anom bruă wai lăng kyâo glai ră anai prăk yua pơdar nao rai ƀu hơmâo ôh, anun ƀu dưi pơđĭ kyar bruă pla kyâo glai.

-Amăng tơlơi tơnap tap kah hăng anun, Dak Lak pơsir tơlơi tơnap tap hiư̆m pă laih anun boh tơhnal dưi ngă hiư̆m pă amăng hơdôm thun giăm anai lĕ ?

-Ơi Nguyễn Quốc Hưng: Jơnum min mơnuih ƀôn sang tơring čar Dak Lak hơmâo Hră pơtrun mrô 1237 lơ 24/5/2021 kơ akŏ bruă pla kyâo glai hăng pla kyâo mơtah mơda ngă tơ-ui lŏn mơ̆ng thun 2021-2025 lĕ 7.268 ha. Truh ră anai, rơgao blan 9 thun 2024 laih hơmâo pla 12.582 ha. Thun 2024 anai, ăt hơmâo pla rơbêh mrô jao, amra hơmâo mơ̆ng 2.500-3.000 ha pơkă hăng akŏ bruă jao 1.817 ha. Anai kiah jing bruă pla kyâo glai, bơ bruă pla kyâo tơ-ui lĕ rim thun pơkă dưm dưm truh 200.000 phun kyâo. Rim thun gơmơi pla djop hăng rơgao mrô jao soh.

-Đơ đam lŏn glai arăng jah drôm phă, kơsing mă hlâo adih prong biă mă kah hăng DakLak jŭ yap truh 128.000 ha, tơring čar hơmâo hơdră hơgĕt pơsir, pơđĭ kyar glăi đơ đam lŏn glai anun?

-Ơi Nguyễn Quốc Hưng: 128.000 ha anai ngă tui mơ̆ng sui laih, truh kơ 20 thun hăng anai, ƀu djơ̆ lăi phrâo ôh, ƀing gơmơi ƀu anăm rŭ glăi abih bang mơtam ôh. Tơdah ƀing ta ăt dŏ djă pioh lŏn kơ plah wah bruă wai lăng glai klô samơ̆ mơnuih ƀôn sang ư̆ rơpa kơƀah lŏn ngă hmua lĕ ta ăt ƀu anăm pơgang lơi. Gơmơi amra dăp glăi, pơkă hnơ̆ng ĕp lăng lŏn mơ̆ng plah anom bruă dŏ wai lăng anun. Sem lang hơdôm rơnoh pơkă hnơ̆ng mơ̆ng kơnuk kơna hơmâo pơsit brơi laih hăng bruă pơkă glăi lŏn glai ƀơi rim boh tơring glông, mơ̆ng anun kah pơpha glăi lŏn kơ mơnuih ƀôn sang ngă hmua, lŏn kơ mơnuih ƀôn sang dŏ. Đơ đam lŏn pơpă pơkă jing lŏn glai, hơmâo kyâo glai dŏ lĕ khom wai lăng tong ten. Đơ đam rơngiă laih kyâo glai, pơphun pla glăi, pla kyâo anet, pla kyâo pơprong, ngă hrŏm đang hmua hăng pla kyâo rah.

-Hră pơtrun mrô 23 thun 2022 mơ̆ng Ding jum kơđi čar kơ anăp ngă bruă pơđĭ kyar glai klô kual Dap Kơdư brơi kơtưn pla kyâo ngă tơ-ui amăng kual, đing nao rŭ glăi hăng pơđĭ kyar glai rưng. Dak Lak hơmâo hơdră hơgĕt mơ̆n pơsir kơ tơlơi anai?

-Ơi Nguyễn Quốc Hưng: Amăng rơwư̆ anai tơnap biă mă ĕp prăk tuh pơ alin kơ bruă pla kyâo glai, khă hnun, ƀing gơmơi khom ĕp djop hơdră mơ̆n laih anun anăp nao ngă bruă, pơčrâo brơi djop kông ty wai lăng kyâo glai ăt kah hăng djop sang bruă ngă hrŏm laih anun mơnuih ƀôn sang kơtưn pla kyâo glai. Ƀing gơmơi hlăk pơtrut kơtang djop sang bruă anet tuh pơ alin djru mơnuih ƀôn sang hơmâo lŏn glai pơsit hră pla kyâo glai FSC, hră pơ anăn pla kyaoa glai hơđong. Tơdah hơmâo hră pơsit tui anun, arăng amra tŭ mă prăk apah mơ̆ng bruă pla kyâo glai, sang bruă sĭ mơdrô ăt tŭ mă prăk apah mơ̆n, rơnoh sĭ kyâo pla pơmă hloh boh ƀiă ñu 10%. Hrŏm hăng anun, kơ bruă ngă hră pơar ƀing gơmơi ăt djru ba abih pran jua ngă gêh găl kơ djop sang bruă bơwih ƀong haư sĭ mwodrô, mơnuih ƀôn sang pla kyâo glai dưi ngă bruă djru hrŏm pla kyâo.

Hră pơtrun mrô 58 mơ̆ng Kơnuk kơna phrâo čih pơtrun blan 5 thun 2025 ăt hơmâo laih mơ̆n hơdôm jơlan hơdră djru. Ƀing gơmơi hlăk pơkra hơdră laih anun pơtô brơi sang bruă mơdrô, mơnuih ƀôn sang ngă hiư̆m pă dăp hơdră, pơjing akŏ bruă pioh kơnuk kơna djru prăk tui jơlan hơdră phrâo, tŭ mă tơlơi djru anun.

-Hnun hă, bơni kơ ih ơi Nguyễn Quốc Hưng, Khua anom bruă tơhan wai lăng glai klô tơring čar Dak Lak hơmâo pioh mông bơ ră ruai anai!