Jơnum hơmâo pơphun tơdơi kơ ƀuh anŏ aka ƀu klă, hơdôm tơlơi gun găn, bơrơsua hăng ngă hơgŏm, mơ̆ anom bơwih ƀong sĭ mơdrô pơ tač rơngiao ƀơi Dak Lak glăk bưp mơng hơdôm kơthung boh sầu riêng blung a bao sĭ mơdrô pơ tač rơngiao. Tui tơlơi lăi pơthâo amăng mông jơnum, truh ră anai Dak Lak hơmâo pla rơbêh 15.200 ektar sầu riêng, đĭ 13.000 ektar pơhmu hăng thun 2015. Pĕ pơhrui amăng thun 2022 rơbêh 150 rơbâo tơ̆n, him lăng amra đĭ truh pơ 300.000 tơ̆n amăng thun 2025.

Sang dưm boh sầu riêng mơng sa anom sĭ mơdrô ƀơi Dak Lak

Kơ bruă ba sĭ mơdrô pơ tač rơngiao, thun 2022 lĕ thun blung a boh sầu riêng Dak Lak kah hăng đơ đam dêh čar ba sĭ mơdrô lu hloh pơ dêh čar Khač, anai lĕ dêh čar blơi mut 99% sầu riêng amăng rŏng lŏn tơnah. Kiăng pơsir hĭ hơdôm tơlơi gun găn amăng pơlir pơđĭ kyar gơnong bruă sầu riêng, hrưn đĭ bơkơtưn amăng sĭ mơdrô, khua mua Jơnum min mơnuih ƀon sang tơring čar Dak Lak rơkâo hơdôm anom bruă bơdjơ̆ nao wai lăng, gum hrŏm klă ƀiă dong hăng pơsir hmao tlôn hơdôm bruă tơnap tap phrâo ƀuh, pơtrut akŏ pơjing khul sầu riêng kiăng pơhlôm klă djơ̆ hăng tơlơi dưi.