VOV4.Jarai-Hlăk hơdôm thun rơnoh boh cau (boh pơnang) yôm, sĭ mơtah rơbêh 100 rơbâo prăk sa kg, ngă kơ ly sang anŏ luh nao pla boh kau soh ƀơi Dak Lak. Samơ̆ mơ̆ng blan 9 truh pơ anai, rơnoh sĭ trun hĭ, ƀơi anŏ dŏ glăi 15 rơbâo prăk đôč, mơnuih ngă hmua hăng hơdôm sang sĭ mơdrô blơi ƀhu krô ƀơi Dak Lak dŏ ƀu hơđong dong ƀu mơak ôh. Minh Huệ pô čih tơlơi pơhing Gong phun jua pơhiăp Việt Nam dŏ ƀơi kual Dap kơdư ră ruai glăi.

Ơi Phan Xuân Hòa, dŏ pơ thôn 85, să Ea Tiêu, tơring glông Čư̆ Kuin, tơring čar Dak Lak ngă bruă pla boh kau truh 40 thun laih. Sang anŏ ñu pla 6000 met karê đang boh kau pioh pĕ sĭ. Ñu brơi thâo, hlâo rơnoh sĭ mơtah mah ƀu pơmă ôh samơ̆ ñu hơđong. Klâo thun giăm anai lĕ, rơnoh đĭ trun, thun 2021, ƀơi anŏ đĭ truh 120 rơbâo prăk sa kg. Khă hnun, yôm đơi, trun hĭ dŏ 20 rơbâo sa ră anai:

“Boh kau pĕ hơmâo hmăi mơ̆n samơ̆ nua rơgêh đơi, thun hlâo ƀơi anŏ pơmă truh 120 rơbâo sa kg, ƀơi anŏ 92 rơbâo prăk sa. Bơ ră anai trun hĭ dŏ 22 rơbâo prăk đôč sa kg”.

Ơi Phan Xuân Hòa bơngơ̆t biă mă rơnoh boh kau trun

Treng jơlan nao pơ să Ea Tiêu, tơring glông Čư̆ Kuin-Ea Kao plơi prong Ƀuôn Ma Thuôt, lu đang hmua arăng pla boh kau lăng hiam biă mă. Ƀu kơnong pla treng war pơga đôč ôh, lu sang anŏ arăng pla amăng đang kơphê, đang tiu kiăng pơhrui glăi lu ƀiă.

Ơi Nguyễn Đắc Tiến, Khua khul mơnuih ngă hmua să Ea Tiêu, tơring glông Čư Kuin, brơi thâo, lơ̆m rơnoh pla boh kau hơđong, djuai phun pla anai mơnuih ƀôn sang luh nao pla lu amăng hmua, đang. Ră anai nua rơgêh ngă kơ mơnuih ngă hmua bơngơ̆t biă mă:

“Ră anai mơnuih ƀôn sang hlăk pĕ boh kau sĭ samơ̆ ruah pơjeh boh kau wil đôč, aka hyu blơi lu ôh. Mơnuih ngă hmua bơngơ̆t biă mă, nua trun kơtang bơbeč truh kơ hnong pơhrui glăi mơ̆ng mơnuih ƀôn sang”.

Rơnoh boh kau đĭ trun bơbeč djơ̆ prong biă mă kơ mơnuih ngă hmua, ƀing blơi pơkra ba ƀhu ăt ƀu hơmâo anih blơi ba sĭ lơi. Ơi Nguyễn Hồng Hạnh, să Dray Bhăng, tơring glông Čư̆ Kuin lăi, hơdôm thun hlâo ƀuh nua boh kau pơmă, man pơdong sang ƀhu, pơkra boh kau krô pioh sĭ pơ dêh čar Khač tui jơlan amrĕ đôč. Ră anai rơnoh trun hĭ ƀu dưi ba sĭ ôh, sang anŏ ñu bơngơ̆t biă mă:

“Blung a ƀuh hơđong mơ̆n, boh kau hơmâo kơmlai sĭ mơdrô, ƀing ngă hmua hăng pô sang sĭ mơdrô mơak hrom. Samơ̆ ră anai gah dêh čar Khač arăng krư̆ bah amăng ƀu blơi dơ̆ng tah, lu sang sĭ mơdrô boh kau pơ Việt Nam lup kơtang biă mă. Ră anai, hrup hăng ngă wăn ƀa, tuh rơyuh prăk kăk laih tơguan gah dêh čar Khač blơi đôč. Ƀuh rơđah ră anai tơphă hă ƀô̆ aka ƀu thâo ôh, lup leč rơbêh 5 klai prăk”.

Lu sang sĭ mơdrô pơkra ming boh kau bơngơ̆t yua blơi laih boh kau mơ̆ng akŏ bơyan ră anai ƀu thâo ba sĭ mơdrô

Thạc sĩ Lê Thị Hạnh Phúc, gah anom pơtô hrăm ngă hmua-pla kyâo Sang hră Cao Đẳng pơtô bruă mă kual Dap Kơdư lăi; boh kau lĕ phun ñu akha lu biă mă, ngă sat hĭ lŏn. Ƀơi hơdôm anih lŏn pơtâo rơga, kơdư čư̆ pla ñu dưi mơ̆n. Samơ̆ lŏn hiam lŏn drơ̆t pla lĕ khom hơmâo hơdră lăng nao pơ anăp sui thun djơ̆ lăp, tơdah pla lu tŭ kơ hơmâo tơdơi anai tơnap biă pla phun pla pơkŏn. Mơnuih ngă hmua khom hơmâo hơdră pơmin lui, ĕp anih blơi hơđong kah ba pla, anăm pla lu đơi ôh kơñ ƀu hơmâo hơdră pơsir tơnap biă mă.

Nai prin tha Hoàng Mjanh Cường, Khua anom pơtô hrăm  gah bruă hmua pla kyâo, sang bruă kơsem min Bruă ngă huma kual Dap Kơdư brơi thâo, amăng 5 thun giăm anai, yua rơnoh sĭ mơdrô boh kau yôm anun yơh lu mơnuih luh nao pla boh kau biă mă ƀơi hơdôm tơring glông Čư̆ Kuin, Čư̆ Mgar, Krông Pač, plơi prong Ƀuôn Hồ….Dak Lak. Boh kau arăng pơkra ia su tơgơi, pơkra ƀañ kĕo, gah dêh čar Khač đôč blơi lu. Anih blơi lĕ mơ̆ng 4 boh dêh čar Philippines, Indonesia, Việt Nam hăng Thái Lan, wơ̆t hăng dêh čar Khač hai ăt pla boh kau mơ̆n.

Nai prin tha Hoàng Mạnh Cường lăi: kơ jơlan hơdră, bruă mă pla pơjing khom ruah mă anŏ gêh găl či pla, phun kau aka ƀu djơ̆ phun pla hơđong kjăp ôh pioh sĭ mơdrô sui thun pơ anăp adih. Kah hăng ră anai, tơdah tơring čar Dak Lak hăng hơdôm tơring čar amăng kual Dap Kơdư ăt lăng phun pla anai phun lĕ khom pơkă hnong lăp djơ̆, tơdah ƀu pơmin dlam hăng pơtong kjăp pla lu ƀu hơmâo anih ba sĭ mơdrô, lui mơai mơnuih ngă hmua pla hơgĕt či pla lĕ kơñ ba truh tơlơi sat răm ƀu anet ôh hơdôm thun pơ anăp adih.

                                                            VOV Dap Kơdư-Nay Jek: Pơblang