VOV4.Jarai - Ră anai tiu glăk amăng bơyan pĕ laih, samơ̆ ƀing pla tiu ƀơi Dak Lăk ƀu mơ-ak đơi ôh yua thun anai tiu pơmă samơ̆ bu mơboh ôh. Tui hăng sang anŏ ayong Võ Văn Quỳnh, ƀuôn Ta Ra, să Hòa Đông, tơring glông Krông Pač, tơring čar Dak Lăk, amăng bơyan pĕ tiu anai khŏm iâu mơnuih mơng anai mơng adih rai pĕ. Yua klin Covid-19 anun jing hyu ĕp mơnuih pĕ tiu tơnap biă, prăk apah arăng truh 220.000 prăk/hrơi.

Tiu pơmă samơ̆ ƀu mơboh ôh , anun jing ƀing ngă tiu bu mơ-ak đơi ôh.

Mơta pơkŏn dong, bơyan anai ƀu mơboh đơi ôh, tiu aset hloh giăm ha mơkrah mah nua tiu pơmă yŭ ngŏ kơ 80 klăk prăk/tơn, prăk dŏ glăi jing ƀu hơmâo đơi dong tah. Tui hăng mrô jŭ yap mơng Gơnong bruă hmua hăng pơđĭ kyar plơi pla tơring čar Dak Lăk, ră anai, tơring čar hơmâo rơbêh 33.100 ektar đang tiu, pơhrui glăi giăm 77.000 tơn. Thun blan rơgao, anom bruă ngă hmua hơmâo pơtă pơtăn laih kơ mơnuih ƀon sang ƀu dưi pok prong anih pla ôh, pơƀut pơđĭ kyar ngă tiu hơđong kơjăp đôč.

Siu H’Mai: Pơblang