VOV4.Jarai - Lơ 20/9, ƀơi plơi prong Buôn Ma Thuột, Jơnum min mơnuih ƀon sang tơring čar Dak Lak pơphun Jơnum kơ tơlơi dưi hăng tơlơi lông hăng gơnam đang hmua yôm ƀơi Dak Lak lơ̆m Việt Nam mut hrŏm hơdôm tơlơi pokôl sĭ mơdrô rơngai phrâo (FTA).

Mông jơnum

Tui hră lăi pơthâo amăng mông jơnum, hơdôm gơnam đang hmua yôm hloh ƀơi Dak Lak hơmâo ba sĭ mơdrô pơ rơbêh 80 boh dêh čar amăng rŏng lŏn tơnah hăng kual lŏn. Sit biă ñu, hơdôm gơnam đang hmua anun lĕ kơphê, kơsu, tiu, ia hơni dưi ba sĭ mơdrô pơ hơdôm dêh čar Mi, Japan, kual EU. Samơ̆, nua sĭ mơdrô gơnam đang hmua ƀơi Dak Lak aka ƀu hơđong ôh; gơnam đang hmua sĭ mơdrô pơ tač rơngiao lĕ aka ƀu pơkra pơjing hiam hơdjă, yua anun khŏm ba sĭ pơ dêh čar tal dua, yua anun ngă nua aset đôč.

Ơi Lê Thanh Hòa đĭ pơhiăp amăng mông jơnum

Bơkơtuai amăng mông jơnum, ƀing rơgơi kơhnâo brơi thâo bruă črâo ba amăng pơkra pơjing lĕ yôm hloh, bruă pơkra pơjing hiam hơdjă kiăng wai lăng kjăp, pơhlôm djơ̆ hăng tơlơi pơkă mơng anih anom blơi mut gơnam amăng lŏn ia hăng tač rơngiao, tơpă sit amăng tơlơi pơhing mơng gơnam đang hmua.

Siu Đoan: Pơblang