Hăng tơlơi djru ba mơ̆ng sang bruă kơnuk kơna tơring čar Dak Nông, lu mơnuih ngă hmua, sang bruă ngă ƀong hrom hơmâo pơdah thâo gơnam sĭ mơdrô mơ̆ng sang anŏ pô amăng plăng điện tử pioh lăi pơthâo sĭ mơdrô. Boh tơhnal bơ lăi nao rai sĭ mơdrô ăt tŭ yua mơ̆n hăng lu tơlơi čang rơmang ƀuăn ba, jing sa hơdră ba sĭ mơdrô arăng blơi gơnam boh čroh đang hmua tŭ yua, djru pơblih hơdră pơmin bruă mă pơkra ming sĭ mơdrô mơ̆ng mơnuih ngă hmua.

Ƀơi tơngan djă măi telephôn rơgơi hăng ngă tui sa, dua črăn kah hăng čơphil rup, čih klah čun anăn gơnam boh čroh, phun tơdŭ anih ba sĭ, rơnoh sĭ mơdrô, hơdră pơsur ngă hmua sĭ mơdrô, ơi Đồng Xuân Liền, Khua sang bruă ngă ƀong hrom Nam Bình, tơring glông Dak Song, Dak Nông  hơmâo pơdah thâo asar pơjeh tiu jŭ sĭ amăng plăng điện tử Postmart. Ơi Liền brơi thâo, 2 blan hlâo Khul mơnuih ƀôn sang ngă hmua tơring čar hăng Sang dăng kông tơring čar hơmâo ngă hrom pơtô hrăm kơ djop sang bruă ngă ƀong hrom ba gơnam boh čroh đang hmua pơdah thâo amăng plăng điện tử pioh sĭ mơdrô.

Mơnuih ngă hmua ƀơi Dak Nông ƀu tơguan nao pơ sang čơ ôh, dŏ pơ sang đôč, ĕp lăng telephôn dưi mơ̆n sĭ mơdrô gơnam amăng plăng điện tử. Rup-Hră pơhing Gia Lai

Hnang blung ñu hăng ƀing ding kơna amăng sang bruă ngă ƀong hrom ăt dơ̆ sư̆ rơbư̆ đôč, samơ̆ hơmâo tơlơi gum djru tong ten, ră anai bruă ba gơnam đang hmua pơdah thâo amăng Online pioh sĭ mơdrô gêh găl biă mă, hơmâo hơdôm mơta gơnam sĭ mơdrô čih anăn rơkâo blơi, ngă kơ ñu hok mơak:

“Giong hrăm hơduah ĕp lăng, amăng hră pơar rơkâo čih anăn hăng hơmâo ană amôn pơtô brơi dơ̆ng, tal blung a gơmơi hơmâo pơdah thâo dram gơnam boh čroh đang hmua mơ̆ng sang bruă ngă ƀong hrom sĭ mơdrô amăng plăng điện tử mơak biă mă. Kơnong ƀiă hrơi mông đôč hơmâo hră rơkâo čih anăn blơi, samơ̆ aka ƀu lu ôh hơmâo laih mơ̆n hră pơkôl blơi gơnam mơ̆ng sang bruă ngă ƀong hrom, anai lĕ tơlơi mơak prong biă mă"”

Mơ̆ng hrơi pơblih pôr pơthâo amăng plăng sĭ mơdrô gơnam hăng plăng điện tử, yă Nguyễn Thị Ngọc Sen dŏ pơ phường Nghiã Đức, plơi prong Gia Nghiã ƀu tơguan đuăi hyu yŭ ngŏ ba gơnam pioh sĭ mơdrô kah hăng hlâo dơ̆ng tah. Yă brơi thâo, hlâo adih, gơnam tam boh čroh tơmŭn tuk sreh gơñu pla giong hyu ba dưm amăng sang sĭ mơdrô ƀudah ba sĭ kơ tuai mơnuih juăt đôč. Dơ̆ng mơ̆ng pơdah thâo amăng plăng sĭ mơdrô hăng điện tử sang anŏ kơnong pĕ boh, dưm amăng kơdung klă hiam amra hơmâo mơnuih nao pơgiăng mă tơl sang laih anun mơ-it amăng sang dăng kông, ba tơl tơngan mơnuih blơi, jao kơ pô blơi, mă prăk giong yơh. Tơlơi pơhing sĭ mơdrô amăng plăng điện tử mơ̆ng yă Sen brơi thâo, hơdôm gơnam sĭ mơdrô kah hăng : Kim Long, Hoàng Long, Kim Hoàng Hậu…dưi pla amăng sang mơnil dăng hơñol pơgang arăng aruač djơ̆ tơhnal pơkă VietGap. Hơdră wai lăng răk rem, pruai kmơ̆k, bruih ia…dưi ngă djơ̆ hơdră bruih ia tơdjôh. Tal blung a dŏ sư̆ rơbư̆ yua aka ƀu thâo tum boh thâo ia rơgơi, yă Sen hok mơak lơ̆m gơnam sĭ mwodrô gơñu hơmâo pơdah thâo amăng plăng internet arăng thâo hăng blơi tŭ yua, hơmâo mông gêh găl kơ tuai thâo krăn lu hloh:

“Dưi hơmâo Khul mơnuih ngă hmua tơring čar jak hyu nao jơnum bơkơtuai anun thâo pơdah thâo gơnam đang hmua, tơmun tuk sreh lăi pơthâo sĭ mơdrô plăng điện tử Postmart Dak Nông. Ăt mơak mơ̆n, ngă hrom dưi ba pơdah thâo gơnam sang anŏ ta ba nao pơ gah rơngiao tơring čar, jai hrơi lu tui. Ră anai, sĭ hơmâo 1 tơn mơkrah laih samơ̆ čang rơmang tơdơi anai sa wơ̆t sĭ amra hơmâo mơ̆ng 4-5 tơn hnong pơhrui glăi amra lu tui”.

Ba gơnam đang hmua sĭ mơdrô amăng điện tử djru mơnuih ngă hmua ƀơi Dak Nông hơmâo dơ̆ng plăng tơlơi pơhing sĭ blơi gơnam amuñ hloh ĕp anih sĭ mơdrô. Rup ĕp mă amăng internet

Dŏ amăng hơdră pơtrut pơblih ba yua mrô amăng bruă ngă hmua, Khul mơnuih ngă hmua tơring čar Dak Nông hơmâo ngă hrom sang bruă dăng kông tơring čar pơphun pơtô hrăm kơ mơnuih ngă hmua thâo ba gơnam sĭ mơdrô gơñu amăng plăng điện tử Postmart. Giong hrăm hăng hmư̆ arăng pơtô, djru ba ƀơi anăp mơtam, truh ră anai hơmâo laih 38 mơta gơnam mơ̆ng 28 boh sang anŏ ngă hmua pla pơjing hơmâo čih anăn pơtep hla pơar gru bơkơnăl sit nik mơ̆ng anom bruă dăng kông.

Ơi Hồ Gấm, Khua khul mơnuih ngă hmua tơring čar Dak Nông brơi thâo, ră anai, mơnuih ngă hmua hăng sang bruă ngă hrom bơwih ƀong, sang bruă sĭ mơdrpp dŏ bưp lu tơlơi tơnap tap kơ bruă hơduah ĕp ba tơlơi pơhing, hơdră ngă hră pơar rơkâo pơsit hnong pơkă hiam klă pioh pơdah thâo anih sĭ mơdrô amăng plăng điện tử. Yua kơ anun, bruă djru mơnuih ngă hmua hăng sang bruă ngă ƀong hrom mông anai kiăng biă mă:

“Ƀing gơmơi čang rơmang lĕ, blung hlâo gleng nao kơ djop mơta gơnam sĭ mơdrô mơ̆ hơmâo pơkă tơhnal pơtrun OCOP khom dưi pơdah thâo amăng anih lăi pơthâo plăng điện tử, dưi hơmâo anom bruă pơsit brơi hnong hiam klă, hơmâo tơlơi đăo kơnang bơwih ƀong huă. Ƀrư̆ ƀrư̆ ƀing ta ba gơnam pơdah thâo amăng anăn sĭ mơdrô điện tử, sĭ mơdrô pơtruh nao rai tơpă, pơhaih rơđah rơđongm amuñ pơƀut hăng ba hyu”.

Pơđĭ amăng anih sĭ mơdrô, dưm anăn amăng điện tử, gơnam đang hmua mơ̆ng mơnuih ngă hmua Dak Nông hơmâo tơlơi gêh găl tơpă gah tơlơi pơhing, pôr pơthâo, kơtưn mông gêh găl pơtruh brơi kơ ƀing tuai amuñ tŭ mă, blơi yua, samơ̆ ăt kiăng lu kơ anŏ klă hiam, gru pơsit gơnam sĭ mơdrô hơdjă. Yua hơdôm tơlơi anun yơh, kiăng mơnuih ngă hmua khom pơblih hơdră pla pơjing, gleng nao kơ hơdôm bruă ngă pơhlôm rơnuk rơnua, pơđĭ tui anŏ klă hiam gơnam tam boh čroh hăng pơkra ming tơdơi kơ pĕ pioh. Ngă hnun kah, bruă ba pơdah thâo amăng anih sĭ mơdrô hăng điện tử mơ̆ng ba glăi boh tŭ yua, kiăng mơnuih ngă hmua hơđong ĕp tơlơi gêh găl ba sĭ mơdrô gơnam tam mơ̆ng đang hmua sang anŏ ta