Hơdôm hrơi hăng anai, sang anŏ ơi Y Kem dŏ pơ ƀon Bu Pah, să Trường Xuân, tơring glông Dak Song, dŏ ƀu hơđong dong ƀu mơak ôh yua hmua đang kơphê sang anŏ gơñu ƀing dop pĕ dop. Ơi Y Kem brơi thâo, rơbêh 50 phun kơphê arăng wok than, pĕ ruač, rongiă truh 400 kg.Anai lĕ ƀu tal blung a ôh kơphê gơñu arăng pĕ dop, yua đang kơphê ataih mơ̆ng sang 1 km:

“3 thun hăng anai laih, kơphê truh bơyan pĕ boh lêng kơ rơngiă arăng dŏp pe soh. Bơyan pĕ kơphê lu mơnuih mơ̆ng plơi pla pơkŏn rai pĕ kơphê, ta ƀu thâo krăn hlơi ôh, ƀu thâo ƀôn hơƀơi, plơi pơpă, anun rơngiă kơphê ƀu thâo ƀuh ôh, tơnap biă mă”.

Ơi Y Kem  ƀơi anăp đang kơphê ñu arăng dop pĕ hĭ

Dưi thâo ƀơi tơring glông anai bơyan pĕ kơphê thun hlâo, hơmâo dua sang anŏ kơphê rơngiă arăng pĕ dop hĭ. Kiăng pơgang dram gơnam kông ngăn, mơnuih ƀôn sang hơmâo đang hmua amăng kual ngă hrom djru nao rai pơpha mơnuih hyu ĕp lăng amăng mơmŏt mlam. Samơ̆ tơlơi dop kưp ăt dŏ hơmâo đôč tơlơi arăng klĕ dop kơphê amăng đang, hmua đang ataih ƀiă hăng plơi hơmâo jơlan anet. Yua kơ anun, rơngiao kơ ngă hrom hyu ep lăng ƀơi hơdôm jơlan amur, anih dưm truă kamera pioh lăng sŭ ƀing dop. Ơi Lê Ngọc Ga, dŏ pơ să Trường Xuân, tơring glông Dak Song, brơi thâo:

“Mơmŏt mlăm lĕ ăt nao ĕp lăng na nao mơ̆n pơ hmua. Hmua gơmơi dưm truă kamera pioh lăng sŭ gah anăp, gah klôn sang, jơlan rơbat. Sit khua mua amăng ƀôn kiăng lăng, ta pok ĕp lăng kamera anun kiăng ƀuh mơnuih dop ƀudah ƀuh ƀing đuăi hyu ƀu tơpă, dop gơnam boh troh đang hmua, kơphê đah mơnuih ƀôn sang hơđong ƀiă pran jua”.

Kông an hơmâo mă 5 čô mơnuih juăt pĕ dop kơphê arăng

Tơlơi dop kưp pĕ kơphê ngă kơ mơnuih ƀôn sang bơngơ̆t biă mă, yua dah gơñu rơngiă kông ngăn, kơphê ƀing dŏp trơ̆i than, ruač boh ngă sat hĭ čơnuh kơphê thun tơdơi. Ƀu kơnong dop kơphê đôč ôh, ƀing soh sat mơneč mă mông anun mơ̆n ngă soh. Phrâo anai, sa boh sang anŏ mơnuih ƀôn sang pơ să Dak Sin, tơring glông Dak Rlâp, arăng pĕ dop kơphê hăng mă wơ̆t rơdêh thut laih anun prăk mah rơngiă abih. Bơ ƀơi Quảng Thành, plơi prong Gia Nghĩa, tơhan kông an ƀuh sa čô mơnuih đuăi kơdop mơnuih arăng suh ĕp mut nao mă bruă apah kơ arăng…

Kiăng pơgang tơlơi rơnuk rơnua kơ bơyan pĕ kơphê, djop plơi pla amăng tơring čar Dak Nông hơmâo pơtrut bruă pơtô pơblang, pơhŭi hlâo, kiăng thâo krăn hơdră ƀing soh sat juăt ngă. Tơhan kông an pơ kual plơi pla juăt hyu sem lăng, ĕp djop anih amăng anih dŏ apah, hyu ĕp bruă mă apah, ngă bruă pĕ kơphê arăng…Kông an Dak Nông pơtă pơtăn mơnuih ƀôn sang mă bruă apah khom pơdah djop hră pơar hră tut tơngan kak kăn kươk, khom čih anăn dŏ jăng jai, tơdah rơkut mơ̆ng plơi pla ăt čih hră pơthâo mơ̆n djơ̆ hăng tơlơi phiăn kơnuk kơna pơkă.

Bơyan pĕ kơphê, mơnuih ngă hmua bơngơ̆t biă mă hŭi tơlơi dop kưp jai lu tui

Đaị uý Nguyễn Văn Đô, Kơ-iăng Khua kông an să Trường Xuân lăi lĕ, hrom hăng lu tơhan kơnuk kơna, tơlơi pơhŭi mơ̆ng mơnuih ƀôn sang amra djru hrom pơgăn tơlơi soh sat amăng bơyan pĕ kơphê. Kah hăng sang anŏ Y Kem, kông an să hyu ĕp lăng, kiăo mă pơkong 5 čô mơnuih hyu pĕ dŏp kơphê arăng. Đaị uý Nguyễn Văn Đô brơi thâo:

“Amăng bơyan pĕ kơphê rĭm thun kông an să ăt pơkra hơdră pơgang hmua pơdai mơnuih ƀôn sang, pơtô lăi mơnuih ƀôn sang khom răng kơđiăng djop mơta tơlơi soh sat, boh nik ñu tơlơi soh dop kưp pĕ kơphê. Kông an să juăt ngă hrom djop grup pơgang plơi pla, grup mơnuih ƀôn sang ngă hyu tir na nao amăng mơmŏt mlam kiăng pơgăn tơlơi dop kưp gơnam mơnuih ƀôn sang. Rơngiao kơ anun, khom thâo hơdôm čô mơnuih mơ̆ng anih pơkŏn mă bruă apah dŏ jăng jao amăng kual, khom tơña hăng pơgăn ƀing hơmâo tơlơi pơmin dop kưp kơphê, kông ngăn mơnuih ƀôn sang”.