VOV4.Jarai - Kiăng pơplih phrâo hơdôm tơlơi pơtrun pơsit, jơlan hơdră, akô̆ bruă pơđĭ kyar đang hmua mơng tơring čar Daklak. Hrom hăng anun, pơsit pơkôl mơng tơring čar amăng bruă djru khul mơnuih bơwih ƀong, mơnuih tuh pơplai nao tuh pơplai, bơwih ƀong huă sĭ mơdrô. Hrơi pơgi, lơ 29/4, Daklak amra pơphun “Jơnum pơtrut tuh pơplai bruă đang hmua tơring čar Daklak thun 2022”. Kiăng rơđah hloh tơhnal gal, rơnoh kơtang, hơdôm hơdră bruă pơtrut pơsur, gum djru tuh pơplai mơng tơring čar, Hương Lý, pô hyu mă tơlơi pơhing phrâo Gong phun jua pơhiăp dêh čar Việt Nam dô̆ mă bruă kual Dăp Kơdư hmâo bruă tơña ơi Nguyễn Đình Trung, Ding kơna Ping gah dêh čar, Khua git gai Ping gah tơring čar Daklak kơ bôh yôm anai.

-Ơ ơi Nguyễn Đình Trung, Daklak dưi lăng lĕ kual phun gah bruă đang hmua mơng Dăp Kơdư ăt kah hăng đơ đam dêh čar, hơdôm hrơi rơgao Daklak hmâo ngă hơget kiăng đang hmua djơ̆ hăng anô̆ gal ñu?

Ơi Nguyễn Đình Trung: Hăng tơring čar amăng hơdôm rơwang bruă phrâo rơgao pơsit na nao bruă đang hmua, mơnuih ngă đang hmua, plơi pla lĕ hơdôm tơlơi mơ̆ tơring čar khom hmâo tơlơi đing nao pha ra. Bôh nik amăng hơdôm hrơi rơgao, bruă bơwih ƀong huă ngă đang hmua hmâo giăm truh 40% amăng hơdră pơđĭ kyar bơwih ƀong mơng tơring čar. Amăng hơdôm thun rơgao ƀơi tơring čar ăt hmâo mơn lu hơdră, lu mơnuih tuh pơplai kơ bruă đang hmua mă yua bôh thâo phrâo hăng bôh nik ñu hmâo laih lu gơnam pơhrui glăi mơng bruă anai ba hyu sĭ amăng dêh čar hăng pơ̆ dêh čar tač rơngiao Pơgi kơdih anai, tơlơi đang hmua ăt lĕ tơlơi dưi hmâo tơring čar đing nao pơđĭ kyar hmâo tơhnal kơjăp phik nao hrom hăng tơlơi đĭ kyar bơwih ƀong mơng tơring čar ăt kah hăng pơđĭ tui tơlơi hơdip mơnuih ƀôn sang.

Khua git gai Ping gah tơring čar Daklak (ao mơtah tŏng krah) čuă hơdră ngă đang trong mơxăm phun bôh troh Nova măi yua hơdră phrâo ƀơi tơring glông Čư̆ Mgar

 -Tui anun pơ̆ anăp anai, Grŭp apăn bruă Ping gah tơring čar hmâo dong tơlơi črâo ba, pơsit jơlan gah hiưm hơpă hăng gơnong bruă đang hmua ơ ơi?

Ơi Nguyễn Đình Trung: Pơ anăp anai, Tơlơi pơtrun pơsit jơnum tal 7 mơng tơring čar hăng hơdôm tơlơi pơtrun pơsit akô̆ bruă ăt ba tơbiă mơn: amăng hơdôm bruă đing nao pơđĭ kyar lĕ hmâo bruă đang hmua. Biă ñu bruă đang hmua mă yua bôh thâo phrâo măi mok kiăng ngă tui tơhnal gal, hơdôm rơnoh kơtang gah bruă đang hmua mơng tơring čar Daklak djru yôm phăn amăng pơđĭ kyar bơwih ƀong mơng plơi pla, ăt kah hăng pơđĭ tui tơlơi hơdip mơda gơnam tam, pran jua mơng mơnuih ƀôn sang. Dăklak ngă gal brơi kiăng ƀing tuh pơplai nao pơ̆ Daklak gum hrom, ngă tui hăng tơring čar, gum hrom neh wa ƀơi tơring čar pơđĭ kyar bơwih ƀong.

Khua git gai Ping gah tơring čar Daklak hmư̆ tơlơi gum pơhiăp mơng anom bơwih ƀong tuh pơplai kơ bruă đang hmua hơdjă

-Kah hăng ih phrâo lăi, Daklak amra ngă gal brơi kiăng mơnuih tuh pơplai rai pơ̆ Daklak, tui anun rơđah biă ñu hiưm hơpă ơ ơi? Biă ñu lom ƀing tuh pơplai ăt hmâo tơlơi pơmin dô̆ djưng djư kơ hơdôm tơlơi bơdjơ̆ nao lŏn drŏn?

Ơi Nguyễn Đình Trung: Tơlơi glăk pơphun pơkă kual tơring čar ăt kah hăng pơkă kơ hơdră mă yua lŏn, hơdôm kual mă yua lŏn ngă đang hmua. Blung hlâo bruă mă mơng kơnuk kơna khom ngă tui klă bruă pơkă kual lŏn pơhlôm klă, djơ̆ hăng bôh nik kiăng lom mơnuih tuh pơplai rai pơ̆ tơring čar hmâo gru than kơsem min, hơduah ĕp hăng pơsit ngă pioh tuh pơplai. Dua lĕ, pơlir hơbit kơplah wah hơdôm bơnah amăng bruă ngă rai gơnam tam, anai ăt lĕ bruă gơgrong mơng tơring čar, tơring čar amra gơgrong tơbiă pơlir nao rai kơplah wah hơdôm bơnah amăng bruă ngă rai gơnam tam tui hơdră phrâo măi mok. Tơlơi tal 3 lĕ, sĭ gơnam tam ăt kah hăng pơkĕ hăng măi mok pơkra gơnam tam hăng hơdôm tơlơi anih anom mă yua jơlan nao rai, hnoh ia hăng hơdôm anom mă yua pơkon kiăng yua kơ hơdôm rơwang bruă đang hmua ngă tui hơdră phrâo.

-Hai, bơni kơ ih hŏ!

Hương Lý: Pô čih – Siu H’ Prăk: Pơblang