VOV4.Jarai- Mơguah 11/3, ƀơi Sang gru grua hăng Sang jơnum tơring čar Sóc Trăng, Ding jum ngă hmua hăng pơđĭ kyar ƀon lan gum hrŏm hăng Jơnum min mơnuih ƀon sang tơring čar Sóc Trăng pơphun jơnum ƀơi anăp hăng lăng nao rai mơng ataih kơ bruă pơđĭ kyar gơnong bruă rông hơdang thun 2022 hăng kĭ tơlơi pơkôl gum hrŏm wai lăng djuai hơdang ia blang thun 2022. Tui hăng anom bruă rông akan hơdang, thun 2021, gơnong bruă rông hơdang pơhrui glăi hơmâo hmăi. Sit biă ñu: Rơnoh pơhrui hơdang djop mơta 970 rơbâo tơ̆n, đĭ 4,3% pơhmu hăng thun 2020, lơ̆m anuun hơdang rông amăng ia blang giăm 930.000 tơ̆n. Tui hăng  akŏ bruă rông hơdang amăng thun 2022, dơnao rông hơdang prong 750.000 ektar; pơhrui hơdang djop mơta 980 rơbâo tơ̆n. Rơnoh sĭ mơdrô pơ tač rơngiao 4 klai đôlar Mi. Kiăng kơ boh glăi tŭ yua tui anai, ƀing khua mua hơmâo bơkơtuai ba tơbiă hơdră bruă, bruă jao anun lĕ đing nao pơphun pơlir hơbit kơplah wah djop anih rông hơdang; pơjing akŏ bruă rông hơdang ia blang amăng hrơi blan dŏ hơmâo klin Covid-19, pơhlôm brơi hơđong nua amăng hrơi blan hơmâo klin.

Siu Đoan: Pơblang