VOV4.Jarai - Ding jum ngă hmua hăng pơđĭ kyar ƀon lan phrâo hơmâo hră pơ-ar mơ-it Ding jum prăk kak kơ bruă mă yua kmơk amăng thun 2021, tơlơi đao lăng hlâo bruă mă yua kmơk amăng thun 2022. Tui anun, Ding jum ngă hmua hăng pơđĭ kyar ƀon lan rơkâo Ding jum prăk kak kơsem min hơdră mă jia sĭ mơdrô pơ tač rơngiao hăng kmơk urê, kmơk DAP, MAP laih dong gum hrŏm hăng djop ding jum, gơnong bruă wai lăng sĭ mơdrô hăng kmơk urê, DAP, MAP kiăng pơhlôm mă yua amăng lŏn ia ta amăng thun blan glăk kơƀah ră anai, nua kmơk sĭ mơdrô amăng rŏng lŏn tơnah hăng amăng lŏn ia đĭ kơtang, glăk ngă tơnap tap, bơbeč nao bruă ngă đang hmua, bruă bơkơtưn gơnam đang hmua hăng tơlơi hơdip kơ mơnuih ƀon sang, sit biă ñu amăng thun blan bưp tơnap tal yua ayuh hyiăng pơplih sat, klin kheng lar hyu sui thun. Pơ anăp anai, sĭ mơdrô kmơk dŏ pơplih ngă tơnap, him lăng amra đĭ nua hăng kơƀah.

Siu Đoan: Pơblang