VOV4.Jarai - Hăng rơbêh kơ 80.000 ektar đang hơbơi plum, pơhrui hmâo rơbêh kơ 1 klăk 600 rơbâo tơn rim thun, ră anai Gialai lĕ tơring čar pla hơbơi plum lu hloh đơ đam dêh čar ta. Khă hnun hai, prăk pơhrui glăi mơng mơnuih ngă đang hmua pla hơbơi plum dô̆ ƀiă, khom hmâo hơdôm tơlơi pơplih mơng bruă pla pơkra hơbơi plum kiăng ngă tui klă bôh tŭ yua mơng kual pla hăng pơđĭ tui prăk pơhrui glăi kơ mơnuih ƀôn sang.

Sang anô̆ amai Rčom H’ Duyệt ƀơi să Čư̆ Ngọc, tơring glông Krông Pa, tơring čar Gialai hmâo 1 ektar. Thun hlâo, kơnang kơ djơ̆ bơyan, nua hơđong, anun rơngiao kơ prăk yua pla, ñu pơhrui hmâo 30 klăk prăk. Thun anai, tơlơi kơman ngă peñ hla hơbơi plum ngă đang pla ƀiă hơbơi, ñu pơhrui hmâo kơnong kơ ha mơkrah bơhmu hăng bơyan hlâo.

“Thun hlâo djơ̆ bơyan, hmâo nua. Thun anai, phun plum ƀu hmâo hơbơi, laih anun phun ñu ƀu hiam. Kiăng kơnuh kơna ba phun hơbơi plum pơjeh phrâo, hmâo lu hơbơi hloh”.

Mơnuih pla hơbơi plum tơring glông Krông Pa, Gialai rŭ hơbơi plum

Ră anai, ƀơi tơring čar Gialai hmâo rơbêh kơ 80.000 ektar đang hơbơi plum, dưi pla lu biă ñu ƀơi hơdôm bôh tơring glông ngŏ dơnung kah hăng Krông Pa, Ayun Pa hăng tơring glông Ia Pa. Khă hnun hai, hăng mrô hơbơi plum hơnong ñu ră anai năng ai ñu 20 tơn sa ektar, rơngiao kơ prăk yua pioh pla, rim ektar pơhrui rim thun hmâo kơnong mơng 20 truh 30 klăk prăk. Ơi Nguyễn Như Cường – Khua Anom wai lăng bruă tơjŭ pla, Ding jum đang hmua hăng pơđĭ kyar ƀôn lan dêh čar ta pơtă mơnuih ngă đang hmua tâ̆o hloh pla djuai hơbơi plum kơdŏng glăi kơman klan môt, hmâo lu hơbơi:

 “Ƀing ta khom ba tơbiă djuai klă, mă yua glông hơdră ngă djop, tum, yua prăk blơi kơmok, ia pruih, ngă hiưm hơpă hmâo lu hơbơi, hmâo nua, mrô hơbơi. Sa tơlơi dong lĕ sang măi pơkra hơbơi plum khom pơkĕ hrom hăng bruă gơgrong amăng pơlar bruă pla pơkra hơbơi plum, djru mơnuih pla pơjing glăi hơdôm bôh anom mă bruă hrom pơsur bruă đang hmua, pơplih hơdră bôh thâo bruă ngă phrâo”.

Ơi Lưu Trung Nghĩa – Khua Gơnong bruă đang hmua hăng pơđĭ kyar ƀôn lan tơring čar Gialai lăi lĕ, khom pơlar djuai phun pla anai tui jơlan gah kơjăp hluai tui pơlir hơbit bruă pla pơkra kơjăp. Đơ đam tơring čar hmâo 5 bôh sang măi pơkra tơpung hơbơi plum, samơ̆ akă hmâo anom hơpă kĭ pơkôl blơi hơbơi plum hăng mơnuih ƀôn sang. Tơlơi anai ngă mơnuih pla hơbơi plum ƀu thâo gơgrong hlâo amăng bruă pla. Hrom hăng anun, hơdră pơkra hơbơi mơng hơdôm sang măi ră anai ƀơi rơnoh hơnong ñu, gơnam sĭ kơ dêh čar tač rơngiao akă lu mơta, pran bơkơtưn akă prong. Pơ̆ anăp anai gơnong bruă đang hmua tơring čar Gialai amra gum hrom hăng Khul hơbơi plum Việt Nam kiăng pơsir hơdôm tơlơi anai:

“Hơdôm hrơi rơgao, lom mơnuih ngă đang hmua pla pơhrui hơbơi plum tui anun, samơ̆ anom sĭ mơdrô kơnong kơ blơi đôč, akă hmâo hră pơkôl mơng akô̆ bơyan. Yua anun čang rơmang lĕ amra hmâo hơdôm bôh sang măi pơkra hmâo tơlơi pơlir nao rai. Ƀing gơmơi amra mă bruă klă hăng Khul hơbơi plum Việt Nam kiăng iâu pơthưr klă, ngă pơhư̆č mut amăng bruă mă anai. Hăng kual pla hơbơi 80.000 ektar anai, tơdah ƀing ta ngă klă bruă anai lĕ amra iâu pơthưr mơng 3 truh kơ 4 bôh sang măi hmâo hơdră pơkra klă, prăk kak klă lĕ pơjing rai kual pla hơbơi plum kơjăp sui thun".

Kơnang kơ dưi pơkra hăng sĭ kơ dêh čar tač rơngiao, ră anai hơbơi plum hăng hơdôm gơnam mă mơng hơbơi plum hmâo anô̆ gal kiăng đĭ nua. Yua anun, kiăng djru pơđĭ tui prăk pơhrui glăi kơ mơnuih ngă đang hmua, hrom hăng anun ngă tui anô̆ gal mơng kual pla hơbơi plum prong hloh dêh čar ta, Gialai khom hmâo hơdôm tơlơi pơplih, pơlar phun hơbơi plum tui jơlan gah kơjăp, ba glăi bôh tŭ yua hloh./.

Nguyễn Thảo: Čih – Siu H’ Prăk: Pơblang