Ĕp lăng hơdôm boh tơhnal phrâo kiăng ngă tui jơlan hơdră OCOP tŭ yua hăng hơđong kjăp, anai lĕ boh tơhnal mơng Jơnum pơtô pơblang jơlan hơdră rĭm boh să sa gơnam OCOP tơl gưl Ping gah, gong gai, khul grup, ƀing pơ ala anom bơwih ƀong sĭ mơdrô, anom bơwih ƀong hrŏ, grup ngă hrŏm, mơnuih ngă hmua amăng tơring čar Dak Lak pơphun tom brơi (19/9). Đơ đam tơring čar Dak Lak ră anai hơmâo 240 gơnam OCOP mơng 3-4 asar pơtŭ. Hơdôm gơnam anai lêng kơ hơmâo anŏ yôm phara kiăng đĭ tui rơnoh yôm jing 5 asar pơtŭ (gưl dêh čar) dưi ba sĭ mơdrô pơ tač rơngiao hơmâo kơphê, ca cao, mak ka.

Ơi Nguyễn Hoài Dương, Khua gơnong bruă ngă hmua hăng pơđĭ kyar ƀon lan tơring čar Dak Lak brơi thâo, anai lĕ hrơi mông kiăng gưl Ping gah, gong gai, khul grup, ƀing pơ ala anom bơwih ƀong sĭ mơdrô, anom bơwih ƀong hrŏm, grup ngă hrŏm, mơnuih ngă đang hmua amăng tơring čar ĕp lăng hơdôm boh tơnal phrâo, ngă tui jơlan hơdră OCOP tŭ yua hăng hơđong kjăp.