Tơdơi kơ pơčrong sai nao rai, khua mua khul pơlir hơbit sang bruă ngă hrŏm mơ̆ng 2 boh tơring čar Hậu Giang hăng Dak Lak tŭ ư hrŏm boh yôm phun kĭ pơkôl pơtrut lăi pơthâo, kah pơpha nao rai tơlơi pơhing bơwih ƀong huă mơ̆ng sang bruă ngă hrŏm lu sang anŏ, lu khul mơnuih mơnam amăng bruă ngă hmua hăng sĭ mơdrô, ăt kah hăng tơlơi pơhing bruă ngă hmua pla pơjing, wai lăng phun boh čroh, sĭ mơdrô gơnam pơkra ming mơ̆ng đang hmua, boh čroh OCOP ba nao pơ anih blơi, anom sĭ mơdrô, lăi pơthâo hơbô̆ bruă djơ̆ lăp, hiam klă, pơdah thâo bruă mă mơ̆ng plơi pla pơkra pơjing gơnam sĭ mơdrô, tơlơi gêh găl mơ̆ng dua bơnah.

Biă mă ñu khul pơlir hơbit ngă hrŏm mơ̆ng 2 boh tơring čar pơpha glăi djop tơring glông anih hơmâo gơnam sĭ mơdrô, kiăng pơdjru nao rai kĭ hră pơkôl mơ̆ng ataih, mơ-it jao brơi tơdruă djru sĭ mơdrô brơi gơnam đang hmua mơ̆ng dua bơnah hơmâo laih anun dua bơnah kiăng blơi nao rai tơdruă. Hrŏm hăng anun, ngă gêh găl brơi khul pơlir hơbit ngă hrŏm 2 boh tơring čar hơmâo mông gêh găl hrăm tơdruă tơlơi thâo thăi, pơtruh nao rai tơlơi pơhing, bưp nao rai jơnum, pôr pơthâo, pơdah brơi gơnam tam, anăn gơnam tam sĭ mơdrô; laih dơ̆ng tơlơi pơhing pơthâo brơi amăng mông jơnum pơdă sang čơ gơnam sĭ mơdrô, mông bưp ĕp anih anom či ba nao gơnam sĭ mơdrô mơ̆ng dua bơnah hlăk kiăng ngă hrŏm.