Ơi Hoàng Văn Ga, sa čô mơnuih ngă hmua ƀơi să Ia Nan, tơring glông Đức Cơ, tơring čar Gia Lai pla 2 hektar kơphê. Ơi Hoàng Văn Ga brơi thâo, pơ-iă hang sui blan ngă kơ phun kơphê jing ƀu hiam, amuñ hơmâo hlăt kơdom ƀong. Amăng mrô giăm 2000 phun kơphê amăng đang, hơmâo laih 600 phun hlăt hmol kơdom ƀong ngă kơ hla kơphê añot kơñĭ, boh ñu krô tui mơn: “Sang anŏ gơmơi hơmâo năng ai 30% mrô kơphê glăk hơmâo hlăk kơdom ƀong mơ̆ pruih jrao aka ƀu abih. Pruih 4, 5 wơ̆t laih, wơ̆t hăng pruih rao mơ̆ng rim ƀĕ phun, mă yua jrao anai jrao adih laih ăt ƀu abih lơi kơdom ƀong, bơbeč sat kơ phun pla, phun ƀơi thơ hơmâo hlăt hmol kơdom ƀong amra răm mơ̆ng 70 truh 100%”.

Ƀơi tơring glông Ia Grai hơmâo rơbêh 18 rơbâo hektar kơphê amăng bơyan glăk mơboh. Hlăt hmol, kơdom ƀong ƀơi lu anih laih. hơdôm boh tơring hơmâo kơphê kơdom ƀong kơtang hloh anun lĕ să Ia Sao, Ia Hrung, Ia Yok,...Hlâo kơ anun, amăng blan 3 thun anai, tơring glông kơnong kơ hơmâo rơbêh 200 ha hơmâo hlăt kơdom ƀong đôč, truh ră anai hơmâo rơbêh 500 ha laih. Tui hăng tơlơi lăi pơthâo mơ̆ng ơi Đỗ Xuân Hiền, Khua anom bruă djru ngă hmua tơring glông Ia Grai, kơdom ƀong lu yua adai pơ-iă hăng hơjan amăng akŏ bơyan anun jing hlăt kman čeh čar lu biă. Kiăng pơgang hlăt kman kơdom ƀong, anom apăn bruă pơtă pơtăn hăng hơdôm blah đang hơmâo kơdom ƀong kơtang kiăng čơkăp hĭ than ñu hŭi kơ ƀă hyu pơ pơkŏn dong; pơgang hlăt kơdom ƀong kơ abih bang đang kơphê hơmâo kơdom ƀơ ƀiă; pơmin tong ten lơ̆m pok prong đang kơphê. Ơi Đỗ Xuân Hiền lăi thim dơ̆ng: “Kơdom ƀong ƀơi kơphê hăng kơdom čeh čar lu phun ñu lĕ yua adai pơ-iă hlor kơtang, wơ̆t hăng hơdôm tal hơjan hlim dong, pơ-iă djrưh amra ngă hơmâo hlăt kơdom ƀong lu hloh”.

Tui hăng Anom bruă tơjuh pla hăng pơgang phun pla tơring čar Gia Lai, hlăt kơdom jing djuai hlăt kman hơmâo lu hloh ƀơi phun kơphê, juăt hơmâo mơ̆ng bơyan kơphê bơnga truh kơ pĕ boh, amra ngă răm rai kơtang biă kơ đang kơphê.

Kiăng djru mơnuih ngă hmua pơgang hlăt, kơdom ƀong, Anom bruă Tơjŭ pla hăng pơgang phun pla tơring čar Gia Lai git gai hơdôm boh tơring, anom bơwih ƀong, anom bruă pla kơphê pơtô ba mơnuih ngă hmua hơdră pơgang kah hăng rơmet agaih đang hmua, čơkăp, trơ̆i than hơmâo kơdom ƀong, čơkăp tơdŭ glông đơi, than ƀu hiam, ƀu mơboh, hăng tơhan tơ-êr ƀơi lŏn, kiăng đang kơphê ñu agaih, rơhuaih, plai ƀiă hlăm kơdom ƀong hyu prong. Ơi Trần Xuân Khải, Khua anom bruă tơjŭ pla hăng pơgang phun pla tơring čar Gia Lai brơi thâo dơ̆ng: “Amăng hrơi blan rơgao, anom bruă tơjŭ pla hăng pơgang phun pla hyu pel ĕp sem lăng đang kơphê, djru ba mơnuih ƀôn sang boh thâo kĭ thuâ̆t wai lăng phun pla, pơgang hlăt kơdom ƀong laih. Hăng hơdôm blah đang hơmâo hlăt kơdom ƀong lĕ neh met wa čơkăp hĭ, duñ pơƀut, čuh hĭ. Hăng hơdôm blah đang plai ƀiă hơmâo kơdom ƀong lĕ neh met wa kiăng tui hơdră pơtô či pơgang”.

Tui hăng mrô jŭ mơ̆ng anom bruă hmua tơring čar Gia Lai, ră anai ƀơi tơring čar hơmâo truh kơ 4.800 ha kơphê hlăt hmol kơdom ƀong. Amăng mrô anai hơmâo lu đang kơdom kơtang biă, ƀu thâo hiam dong tah. Ăt tui hăng tơlơi pơtă pơtăn mơ̆ng anom bruă pơgang phun pla mơn, hăng hơdôm blah đang hơmâo hlăt kơdom kơtang, mơnuih ƀôn sang kiăng čơkăp, trơ̆i than ñu hŭi kơ lar hyu prong. Tơlơi anai ƀu kơnong bơbeč kơ mrô kơphê thun anai đôč ôh mơ̆ wơ̆t hăng lu thun tơdơi dong.

Hăng rơbêh 105 rơbâo ha, kơphê jing phun pla yôm phun mơ̆ng tơring čar Gia Lai. Bruă kơƀah ia pruih yua pơ-iă hang sui wơ̆t hăng lu đang hmua hơmâo hlăt kơdom ƀong, amra bơbeč sat kơ mrô boh pơhrui glăi mơ̆ng phun pla anai. Yua hnun, mơnuih ƀôn sang kiăng pơmin tong ten hlâo či pla thim phun kơphê tơdơi kơ nua kơphê pơmă tui hăng hrơi blan rơgao./.