VOV4.Jarai - Mơguah lơ 11/2, ƀơi ƀôn prong Hà Nội, Ding jum đang hmua hăng pơđĭ kyar ƀôn lan pơphun jơnum lăng nao rai mơng ataih đơ đam dêh čar kơ pơgang, pơgăn klin ruă ƀơi hlô mơnong hăng akan hơdang thun 2022. Thun 2021, añăm hlô đŏ rơbêh kơ 4% bơhmu hăng thun 2020, samơ̆ sa dua mơta klin ruă huĭ rơhyư̆t amăng thun rơgao ngă răm rai laih bruă bơwih ƀong rơbêh kơ 2 rơbâo 500 klai prăk. Ding jum đang hmua hăng pơđĭ kyar ƀôn lan ăt brơi mơn kơ hơdôm tơring čar, ƀôn prong hơdôm pluh rơbâo liều vaccine hăng hơdôm djuai jrao pơgang pơhlôm hlâo klin ruă kơ hlô mơnong hăng akan hơdang. Tui hăng tơlơi pơsit hrom, thun 2022, klin ruă ƀơi hlô mơnong hăng akan hơdang amra prong. Yua anun, amăng mông jơnum, ƀing khua pơ ala bơkơtuai kơ bruă pok pơhai wai lăng djop djuai klin ruă huĭ rơhyư̆t ƀơi hlô mơnong hăng akan hơdang kiăng gal brơi kơ bruă rông glăi, đĭ tui pŭ hlô rông, pơhlôm añăm ƀong hăng djru kơ bruă ba nao sĭ pơ̆ dêh čar tač rơngiao.

Siu H’ Prăk: Pơblang