VOV4.Jarai - Kiăng pơdŏng hơdră, hơdră bruă djru anom bơwih ƀong yak rơgao tơlơi tơnap, pơtrut bơwih ƀong sĭ mơdrô, pơđĭ kyar bơwih ƀong – mơnuih mơnam amăng tơlơi phrâo, čơtlăm lơ 25/3, Grŭp kơsem min pơđĭ kyar bơwih ƀong mơnuih ƀôn sang (gah Gong gai dêh čar) gum hrom hăng Khul hnal kyâu hăng gơnam mă mơng dlai tlô Việt Nam hăng Khul hnal kyâu tơring čar, ƀôn prong pơphun bơkơtuai gum pơhiăp kơ tơlơi lăi pơthâo glăi “Gơnong bruă hnal kyâu Việt Nam: Tơlơi hăng hơdôm jơlan pơsir pơhlôm pơsit jơlan gah bruă mă truh thun 2030”. 10 thun rơgao, gơnong bruă hnal kyâu đĭ kyar klă biă hăng 2 mrô. Thun 2021 , khă bơbeč mơng klin ruă Covid-19, gơnong bruă pơkra hnal kyâu hăng hơdôm gơnam mă mơng kyâu sĭ kơ dêh čar tač rơngiao đơ đam dêh čar ta hmâo rơbêh kơ 1 klai 800 klăk dolar Mi, đĭ 20% bơhmu hăng thun hlâo. Khă hnun hai, kiăng hmâo tơhnal sĭ kơ dêh čar tač rơngiao hmâo 25 klai dolar Mi amăng thun 2030, kiăng hmâo hơdră, hơdră bruă kiăng ngă gal brơi kơ gơnong bruă hnal kyâu pơlar đĭ hloh dong amăng tơlơi phrâo. Amăng mông bơkơtuai, mơnuih pơ ala rơkâo đĭ kơnuk kơna khom hmâo ngăn rơnoh kiăng anom bơwih ƀong tuh pơplai pơplih hơdră bôh thâo phrâo ngă rai gơnam tam, pơtô mơnuih mă bruă hăng hnal kyâu dlai pla amăng lŏn ia./.

Siu H’ Prăk: Pơblang