VOV4.Jarai - Dêh čar ta hăng anô̆ gal gơnam mă mơng đang hmua lu mơta, lu gơnam pha ra mơng kual plơi pla... glăk jing anô̆ gal prong. Samơ̆ kiăng sĭ gơnam tam anai dưi hơđong, kơjăp lĕ rơkâo ba tơbiă kơ mơnuih ngă đang hmua, anom mă bruă hrom, anom bơwih ƀong lĕ khom dưi prăp lui djop bôh thâo sĭ gơnam amăng măi mok mrô, bruă sĭ mơdrô gơnam tui điện tử...

Pla, pơkra gơnam mă mơng đang hmua hơdôm thun jê̆ hăng anai na nao pơjing rai hơdôm tơhnal phrâo. Kiăo tui anun, hơdôm hrơi rơgao, bruă ia hni Việt Nam sĭ kơ kual EU, dêh čar Mi; bôh pơ-ô̆ Sơn La sĭ kơ dêh čar tač rơngiao ngă tơnap truh kih kah hăng dêh čar Anglê, Australia; bôh sầu riêng Daklak sĭ kơ dêh čar Khač, bôh vải Lục Ngạn, Bắc Giang dưi pơsit yôm prong ƀơi Japan, Prang... brơi ƀuh hơdôm hơdră bruă pơdŏng, pơđĭ kyar anăn păn, pơtrut sĭ gơnam hăng biă ñu lĕ bruă lăi pơhing kơ anih anom sĭ mơdrô kơ neh wa ngă đang hmua glăk ngă tui klă.

Gơnam mă gah đang hmua mơng Việt Nam lu mơta, lu djuai

Samơ̆ hơdôm bôh tơhnal anai akă djơ̆ hăng bruă pơđĭ kyar anih anom sĭ mơdrô kơjăp phik, yua kơ bôh nik tơlơi tơnap lom ngă juăt hăng gơnam mă mơng đang hmua, gơnam pha ra hơdôm kual yua kơ hơdră pơkra gơnam akă prong, ngă tơnap kơ bruă sĭ gơnam, yua kơ hơdôm hrơi răk pioh ƀiă hrơi. Hrom hăng anun, bruă ngă juăt ba gơnam mut amăng jơlan sĭ gơnam tui măi mok ƀu amuñ ôh, yua tơlơi pơmin mơng anom bơwih ƀong hăng jơlan gah sĭ mơdrô anai akă ƀu lu. Yă Đinh Tuyết Nhung, Khua Khul pơlir hơbit Anom mă bruă hrom bruă pla phun jrao hăng khul Bắc Kạn lăi đĭ bôh nik:

“Gơnam mă mơng đang hmua hmâo hơdôm hrơi djă pioh ƀiă, hăng anom bruă ăt akă hmâo mơn gru rŭp ăt kah hăng bruă bơwih ƀong sĭ mơdrô kiăng hmâo sa jơlan gah rơđah ngă juăt hăng pô blơi gơnam hăng mrô gơnam sĭ ƀơi anih anom sĭ mơdrô akă ƀu lu. Ƀing gơmơi čang rơmang gong gai amra hmâo jơlan gah rơđah pioh djru hơdôm bôh anom dưi ba hơdôm gơnam amăng jơlan sĭ mơdrô prong”.

Khom dưi pơjing anăn păn kơ gơnam gah đang hmua

Kiăng pơjing jơlan sĭ gơnam hơđong kơ hơdôm gơnam mă mơng đang hmua, khom dưi pơjing anăn păn gơnam tam, pơjing gru rŭp anom bơwih ƀong. Hrom hrom hăng anun lĕ đing nao lu hloh hơdră pơkra gơnam ăt kah hăng hmâo hơdôm hơdră bruă ngă pơhư̆č anom bơwih ƀong pơkra gơnam kiăng gơnam hmâo nua lu hloh.

Khua pơ ala kơ anom sĭ mơdrô điện tử Postmart.vn – ơi Nghiêm Tuấn Anh, Phun akha Sang bruă dăng kông Việt Nam brơi thâo, hluai tui glông jơlan logistic, anih sĭ mơdrô gơnam tui măi mok mơng Dăng kông Việt Nam, hmâo laih lu gơnam sầu riêng sĭ kơ dêh čar Mi, vải thiều kơ Japan, kual Mi Kô̆... Amăng mông pơđĭ kyar mơng bruă sĭ mơdrô điện tử, bruă prăp lui bôh thâo, mă yua măi mok mrô kơ mơnuih ngă đang hmua jing yôm phăn biă:

“Ƀing gơmơi hmâo lu djuai bôh troh jơman, klă hiam, abih bang dưi pơdă sĭ amăng lŏn ia hăng pơ̆ dêh čar tač rơngiao. Ră anai mơnuih ngă đang hmua ƀơi kual čư̆ siăng, plơi pla, hơdră lăi pơhing akă dưi pơđĭ kyar hăng hơdôm bôh tơring čar, ƀôn prong phun. Yua anun, bruă prăp lui bôh thâo kơ mơnuih ngă đang hmua, ƀing gơmơi lăng anun lĕ bruă pơsit blung a kiăng truh kih kơ bruă sĭ mơdrô tui măi mok. Yua anun, ƀing gơmơi ƀu kơnong kơ pơdơi ƀơi bruă pơtô juăt mơnuih ngă đang hmua hơdră ba gơnam đĭ hăng glông măi mok, mă yua gơnam mơng gơñu ôh mơ̆, dô̆ prăp brơi kơ gơñu abih bang hơdôm hơdră bôh thâo amăng măi mok sĭ mơdrô dong”./.

            VOV1 Čih 

Siu H’ Prăk Pơblang