Hơdôm hrơi anai, ơi Võ Đình Việt, ƀơi plơi Lạc Nghiệp, să Tu Tra, tơring glông Đơn Dương, tơring čar Lâm Đồng kah hăng dô̆ hăng dlông anga apui yua kơ ƀu dưi bơwih kơ prăk tla kơmlai sang prăk. Tơdơi kơ tlâ̆o vaccine pơgang bơbrah khil khul ƀơi klĭ Navet – LpVac mơ̆ng Sang bruă Navetco, pŭ rơmô brung 80 drơi mơ̆ng sang anô̆ leng kơ ruă čroh kian kơtang. Amăng anun, 11 drơi djai, 12 drơi plĕ ană, 5 drơi glăk dju tơguan kloh pran, hơdôm drơi dô̆ glăi lĕ ruă lok nao lok rai, ƀu dưi ƀlĕ ia tơsâo rơmô kah hăng blung a. Rơngiao kơ anun, kiăng djru pơjrao brơi pŭ rơmô, sang anô̆ ñu hmâo yua laih rơbêh kơ 1 klai prăk bơwih brơi kơ ia jrao. Tui hăng ơi Võ Đình Việt, răm rai hăng rơmô brung lĕ prong biă, samơ̆ Sang bruă Navetco ba tơbiă rơnoh pơ ala glăi prăk ƀiă hloh kơ nua rơmô sĭ along sa drơi ƀơi anih sĭ mơdrô pơkă:

“Kâo kiăng lăi lĕ, pơ ala glăi 50 klăk sa drơi rơmô djai, bơ̆ rơmô plĕ ană pơ ala glăi kơ ƀing gơmơi khom hmâo 30 klăk prăk. Yua kơ rơmô plĕ ană ƀu dưi mă ia tơsâo rơmô dong tah, rơkâo pơ ala glăi 30 klăk prăk lĕ ƀu hơđong ôh, kâo sĭ rơmô anun hmâo mơ̆ng 10-15 klăk prăk, hrŏm hăng prăk pơ ala glăi 30 klăk prăk thơ kâo mơ̆ng dưi blơi rơmô rông glăi. Tơdah ƀu hmâo 30 klăk prăk kah hăng rơnoh glăk ba tơbiă thơ ƀing gơmơi kơnong kơ lui rông rơmô đôč, ngă hiưm hơpă dưi rông, rơmô pơ̆ hơpă mơ̆ng rông dong”.

Rơnoh nua pơ ala glăi phrâo hloh mơ̆ Sang bruă Navetco ba tơbiă, hăng rơmô brung djai hmâo rơnoh pơ ala glăi 60.000 prăk sa kg yap along sa drơi, 70.000 prăk sa kg hăng rơmô mơkian, 80.000 prăk sa kg rơmô ƀu hmâo mơkian hăng 85.000 prăk sa kg hăng rơmô mơkian... Tui hăng ơi Trần Quang Huy, pô rông rơmô brung ƀơi plơi Lạc Nghiệp, să Tu Tra, tơring glông Đơn Dương, rơnoh nua pơ ala glăi anai mơ̆ng Sang bruă Navetco kơnong kơ dưm dưm hăng 1/3 rơnoh răm rai mơ̆ng mơnuih ngă đang hmua:

“Răm rai lĕ ƀu hmâo hlơi kiăng ôh yap wot sang bruă, samơ̆ bơnah gah sang bruă khom pel ĕp, djru brơi pioh mơnuih ƀôn sang rông glăi rơmô mơ̆ng 70-80%, rim mơnuih răm rai gơgrong ba ƀơƀiă. Bơ̆ ră anai mơnuih ƀôn sang gơgrong ba lu đơi, sang bruă pơ ala glăi ƀiă đơi, prăk sĭ eh rơmô, hrŏm hăng prăk djru ƀu djop pioh tla kơ sang prăk ôh, mă mơ̆ng hơpă ƀing gơmơi rông glăi rơmô brung”.

Tui hăng ơi Trần Văn Hiếu, Khua Khul mơnuih ngă đang hmua plơi Bồng Lai, să Hiệp Thạnh, tơring glông Đức Trọng, Sang bruă Navetco ha jăn ba tơbiă rơnoh nua pơ ala glăi răm rai ƀu hluai tui gru than hơpă ôh. Kơnong yap rơmô brung pioh rông ră anai hmâo nua rơbêh kơ 70 klăk prăk sa drơi, lơm anun rơnoh nua pơ ala glăi akă djop blơi ha mơkrah nua sa drơi rơmô thơ mơnuih ƀôn sang ƀu dưi rông glăi ôh. Hrŏm hăng anun dong, Sang bruă Navetco kơnong kơ yap amăng hơdôm hrơi pơ ala glăi djru mơ̆ng hrơi pơphun hmâo rơmô ruă truh kơ lơ 26/9/2024 lĕ ƀu lăp djơ̆ ôh, yua kơ truh ră anai rơmô ăt dô̆ ruă lok nao lok glăi mơn. Ơi Trần Văn Hiếu, lăi:

“Jơlan gah nua pơ ala glăi sang bruă ba tơbiă ƀu hmâo sa gru than hơpă djơ̆ ôh. Sang bruă lăi hmâo hmư̆ laih tơlơi gum pơhiăp hơdôm bôh anom sĭ rơmô rông, mơnuih ƀôn sang rơkâo khom lăi rơđah anom hơpă kiăng hmâo tơlơi pơhmu nao, yua kơ nua rơmô brung ră anai ƀu ƀiă ôh. Bơhmutu ñu ƀơi Dalat milk nua hơnong ñu lĕ mơ̆ng 70-85 klăk prăk sa drơi rơmô; bơ̆ Sang bruă rơmô brung kual ASIA Thái Bình Dương lĕ hơnong ñu mơng 85-86 klăk prăk sa drơi. Wot hơdôm rơwang bruă mơng Kơnuk kơna kah hăng rơwang bruă pơlar rơmô phrâo tom adih anai ƀơi tơring glông Cát Tiên (Lâm Đồnhg) rim drơi rơmô nua ñu ăt mơ̆ng 75-85 klăk prăk laih mơn sa drơi, ƀu hmâo rơmô hơpă ƀiă nua kah hăng sang bruă lăi anun ôh”.

Yap truh ră anai, ƀirô gơgrong bruă tơring čar Lâm Đồng čih pioh hmâo rơbêh kơ 6.800 drơi rơmô brung ruă čroh kian tơdơi kơ tlâ̆o vaccine pơgang ruă bơbrah klĭ khil khul Navet – LpVac yua kơ Sang bruă Navetco pơkra ôh, amăng anun hmâo giăm truh 500 drơi rơmô djai. Kiăng djru kơ mơnuih rông rơmô, lơ 20/8 phrâo rơgao, Jơnum min mơnuih ƀôn sang tơring čar Lâm Đồng hmâo mă yua tơlơi pơsit pơjing grŭp hyu mă bruă djru pơ ala glăi răm rai ƀơi rơmô brung ruă čroh kian yua kơ tlâ̆o vaccine pơgang ruă bơbrah klĭ khil khul. Khă hnun hai, mơ̆ng anun truh ră anai, grŭp hyu mă bruă anai ăt akă hmâo bruă ngă hơget mơn amăng bruă djru pơ ala glăi kơ mơnuih rông rơmô./.