VOV4.Jarai - Kơman ngă peñ hla hơbơi plum glăk ngă kơtang ƀơi hơdôm bôh tơring glông gah Dơnung tơring čar Gialai. Krông Pa lĕ anih anom hmâo lŏn pla hơbơi plum prong hloh tơring čar Gialai hăng rơbêh kơ 21 rơbâo ektar. Bơyan hơbơi plum thun anai hmâo truh rơbêh kơ 4.000 ektar đang hơbơi plum hmâo kơman ngă peñ hla.

Kơman ngă peñ hla plum ƀơi Dơnung Gialai

Tui hăng anun, ƀơi tơring glông Phú Thiện, bơyan anai pla 6.000 ektar đang hơbơi plum, ră anai hmâo laih rơbêh kơ 50 ektar đang hơbơi plum kơman ngă peñ hla hăng mrô ñu pơčrăm mơng 5-30%. Kơman ngă peñ hla plum hmâo ƀơi sa dua djuai hơbơi plum KM98, KM419, KM140. Bôh than ba truh kơman ngă lĕ, yua kơ mơnuih ƀôn sang rŏng djă pioh djuai hơbơi plum ƀu hmâo ruah mă, blơi djuai plum ƀu rơđah phun akha anun mrô djơ̆ kơman lu. Ƀơi anăp tơlơi anai, hơdôm thun jê̆ hăng anai, gơnong bruă đang hmua hơdôm tơring glông ƀơi Gialai hmâo pơtă laih mơnuih pla hơbơi plum pơplih nao rai pla djuai phun pla, mă yua djuai pla phrâo hmâo hơbơi lu dưi kơdŏng glăi kơman kơtang, ruah mă djuai klă hiam pioh pla...

Siu H’ Prăk: Pơblang