VOV4.Jarai - Ƀơi tơring čar Kon Tum amăng rơbêh 2 blan rơgao hơmâo giăm 30.000 phun sâm Ngọc Linh djai. tơhnal phun ñu lĕ yua hlăt kman, ia ngom hăng hơjan pler. Mrô jŭ yap mơng Jơnum min mơnuih ƀon sang tơring glông Tu Mơ Rông, tơring čar Kon Tum brơi ƀuh, ƀơi kual pla sâm Ngọc Linh 3 boh să mơng tơring kah hăng: Măng Ri, Tê Xăng hăng Ngọc Lây hơmâo rơbêh 29.100 phun sâm djai yua hlăt kman ƀong. Amăng anun hơmâo să Măng Ri hơmâo phun sâm djai lu hloh hăng giăm 20.000 phun.

Hơjan pler ngă joh phun sâm Ngọc Linh ƀơi să Măng Ri, tơring glông Tu Mơ Rông, Kon Tum.

Rơngiao kơ anun, ƀơi dua boh să Măng Ri hăng Đăk Sao hơmâo rơbêh 650 phun sâm djai yua hơjan pler. Tui hăng bruă pơčrang lăng, hlăt kman juăt ƀong phun sâm Ngọc Linh ha thun amăng đang pơdjuai. Hơmâo đơ đam đang sâm Ngọc Linh hlăt ƀong truh 30%. Anom bruă tơjŭ pla hăng pơgang phun pla tơring čar Kon Tum ăt pơtô ba laih mơnuih ƀon sang đah mơng hơmâo hơdră pơgang.

Siu H’Mai: Pơblang