VOV4.Jarai-Yua hơmâo hơjan amăng bơyan phang phrâo anai ƀơi kual Tong krah-kual Dap Kơdư ngă rai lu tơlơi răm ƀăm ƀu ƀiă ôh kơ bruă ngă hmua pla pơjing bơyan puih phang. Samơ̆ ƀơi Kon Tum yua hơmâo ia hơjan anai lĕ pơđĭ tui ia pioh bruih kơ hmua pơdai dưi găn rơgao amăng bơyan phang hang pơđiă thu ia kơtang amăng kual Dap Kơdư. Tơlơi pơhing mơ̆ng Gong phun pơkă lăng ayuh hyiăng hlim hơjan tơring čar Kon Tum brơi ƀuh, tal hơjan ƀu djơ̆ bơyan mơ̆ng lơ 31/3 truh lơ 1/4 amăng tơring čar Kon Tum hơmâo hơjan man ƀrô, ƀơi anih hơmâo hơjan prong đuh đua tlua hmôk.

Ia hơjan anun djru ngă pơđĭ tui ia hăng ngă rơ-ơ̆ lŏn glai, pơdai hmua, phun pla amăng bơyan phang adai pơđiă kơtang phang khôt ngă. Ia hơjan ƀrô djop kơ phun pla dưi rơ-ơ̆, hnong đĭ tui mơ̆ng 25% ia amăng 80 boh dơnao anet prong, hơdôm rơtuh bơnư̆ kong ia hăng sang măi drai apui lơtrik. Anai lĕ tal hơjan yôm biă mă pơđĭ tui ia kơ bruă ngă hmua pla pơjing amăng tơring čar Kon Tum amăng bơyan tơjŭ pla hlâo kơ truh bơyan hơjan thun 2022 či truh laih.

Nay Jek: Pơblang