VOV4.Jarai - Amăng thun anai hơdôm boh sang măi pơkra tơpung hơbơi plum ƀơi tơring čar Kon Tum glăk dong ƀơi anăp kơ bruă kơƀah hơbơi plum pioh pơkra tơpung. Thun anai tơring čar Kon Tum hơmâo đơ đam 39.300 ektar hmua pla hơbơi plum, hăng dưi pơhrui giăm 15 tơ̆n amăng sa ektar. Samơ̆ hơbơi plum ƀuh lu kman ngă peñ hla yua anun pơhrui aset đôč, sa, dua anih mơnuih ƀon sang khŏm rŭ pơrai hĭ. Tơring čar Kon Tum ră anai hơmâo 8 boh sang măi pơkra tơpung hơbơi plum, hơdôm boh sang măi anai glăk bưp tơnap yua kơƀah hơbơi plum.

Phun plum kman ƀong peñ hla ngă rŭ pơhrui aset ƀơi Kon Tum

Ơi Nghiêm Đức Thuần, Khua kông ti pơčuih ngăn sĭ mơdrô gơnam đang hmua pơ tač rơngiao Vina brơi thâo: Hơbơi plum rŭ pơhrui kơnong 15 tơ̆n sa ektar, anai lĕ aset biă mă ƀu pơhlôm djop brơi hơdôm boh sang măi pơkra tơpung. Yua anun hơdôm boh sang măi khŏm nao pơ hơdôm tơring čar pơkŏn ƀudah nao pơ dêh čar Lao blơi hơbơi plum glăi. Rĭm thun 8 boh sang măi pơkra tơpung ƀơi tơring čar Kon Tum pơkra pơjing giăm 320.000 tơ̆n tơpung.

VOV Tây Nguyên/Siu Đoan: Pơblang