Anom bruă wai pơgang hlô rông tơring čar Kon Tum hơmâo pơkiăo nao kơ-iăng khua anom bruă hăng 5 čô mơnuih apăn bruă nao pơ 2 boh să: Xốp hăng Đăk Nhoong kiăng djru anom bruă bơdjơ̆ nao tơring glông Đăk Glei pơgang kman, laih dong črâo brơi mơnuih ƀôn sang bơwih brơi, pơjrao brơi kơbao rơmô ƀă kman. Hrŏm hăng anun anom bruă wai pơgang hlô rông tơring čar Kon Tum hơmâo djru brơi tơring glông Đăk Glei 300 lít ia jrao, 2.500 liều vaccine kiăng kơ tlâ̆o pơgang brơi, pơgăn anăm brơi hơdôm anih hơmâo kman amăng hơdôm boh plơi: Đăk Nhoong, Đăk Ung, să Đăk Nhoong hăng plơi Xốp Nghét, să Xốp lar hyu pơkŏn dong.

Ơi Ưng Văn Thanh, khua anom bruă wai pơgang hlô rông tơring čar Kon Tum brơi thâo: Mrô kơbao rơmô ƀă kman tum pơƀut črâo brơi neh met wa pơjrao brơi. Gong gai ƀon lan hơmâo dưm kơƀang lăi pơthâo kual hơmâo kman kiăng neh met wa anăm blơi, pơdŭ pơgiăng hlô rông tơbiă mơng kual hơmâo kman. Pơphun na nao amăng ha wŏt hrơi tơjuh, rĭm hrơi pruih ia jrao pơgang sa wŏt amăng kual kman.