VOV4.Jarai - Ƀơi tơring čar Kontum tơlơi kơman pơčrăm phun sâm Ngọc Linh ră anai lar hyu ngă răm rai prong biă kơ phun pla, biă ñu hăng hơdôm bôh sang anô̆ djuai ania ƀiă sang anô̆ tơnap tap. Mrô yap glăi mơng dua tơring glông Đăk Glei hăng Tŭ Mrong, tơring čar Kontum brơi ƀuh, truh ră anai hmâo laih năng ai ñu 50.000 ƀĕ phun sâm Ngọc Linh răm rai.

Khua git gai Ping gah, Khua Khul pơ ala mơnuih ƀôn sang tơring čar Kontum Dương Văn Trang lăi kơ anô̆ răm rai mơng mơnuih ƀôn sang lom phun sâm Ngọc Linh djơ̆ kơman ngă

Amăng anun hmâo mrô phun sâm hmâo kơman ngă ƀơi tơring glông Đăk Glei lĕ rơbêh kơ 10.000 bĕ phun sâm hăng tơring glông Tŭ Mrong rơbêh kơ 39.000 bĕ phun. Ƀơi anăp tơlơi kơman ngă ƀơi phun sâm Ngọc Linh lar hyu prong, ngă răm rai prong bruă bơwih ƀong, ƀơi mông Jơnum lok 8 Grŭp mă bruă Ping gah tơring čar tal 16, Khua git gai Ping gah, Khua Khul pơ ala mơnuih ƀôn sang tơring čar Kontum Dương Văn Trang hmâo jao laih bruă gơgrong hăng Gơnong bruă đang hmua hăng pơđĭ kyar ƀôn lan tơring čar.

Mơnuih ƀôn sang să Tê Xăng, tơring glông Tŭ Mrông hăng phun sâm Ngọc Linh kơman eh akan ƀong

Ơi Nguyễn Tấn Liêm, Khua Gơnong bruă lăi lĕ anom hmâo gơgrong hlâo laih amăng tơlơi pơsir kơman ngă ƀơi phun sâm Ngọc Linh. Gah bôh than ba truh kơman pơčrăm ƀơi phun sâm lĕ, biă ñu đang pla hmâo ƀă eh akan, rơngiao kơ anun hmâo sa dua phun ƀă djơ̆ kơman ngă jŭ brŭ akha./.

Siu H’ Prăk: Pơblang