Anom ngă ƀong hrŏm ngă hmua Nam Yang, tơring glông Đăk Đoa, tơring čar Gia Lai hơmâo 150 ha đang kơphê. Kơphê pơhrui glăi amăng bơyan phrâo anai lĕ 450 tơn. Ơi Nguyễn Tấn Công - Khua khul wai lăng anom ngă ƀong hrŏm brơi thâo: lơ̆m nua đĭ truh 100 klăk/tơn, neh met wa hmao klôn sĭ mơtăm 80% mrô kơphê. Mrô dŏ glăi ăt glăk hơmâo sĭ mơn lơ̆m lăng nua glăk trun.

“Nua đĭ mơ̆ng akŏ bơyan laih, tui anun neh met wa sĭ hơmâo prăk lu. Khă hnun, hlơi hlơi kiăng sĭ hơmâo nua 130.000prăk/1kg. Samơ̆ ƀu hơmâo sĭ nua 130.000 prăk lĕ ăt sĭ hăng nua 110.000 prăk, ƀudah 90.000 prăk/kg hai tŭ mơn. Neh met wa thâo hlâo laih nua ñu amra trun mơn, ƀu hơmâo đĭ na nao ôh. Hăng mơnuih ngă hmua, nua mơ̆ng 70 truh kơ 80 prăk/kg jing djơ̆ hăng tơlơi kiăng yơh”.

Lơ̆m mơnuih ngă hmua hmao ba sĭ, jing anom blơi pơkra kơphê anet, găp ƀrô amăng plơi pla amuñ bưp tơlơi tơnap. Ơi Huỳnh Phú Lâm - Khua kông ti pơčruh ngăn kơphê Classic (Pleiku, Gia Lai) pơsit: nua kơphê pơmă, trun kơtang amăng hơdôm blan đôč ngă kơ anih sĭ mơdrô ƀu hơđong. Khă hnun, yua hlom ngă hră pơ-ar blơi sĭ baih, anun jing anom bơwih ƀong khŏm blơi gơnam či pơkra. Tơlơi anai ba truh lu tơlơi tơnap biă kah hăng: prăk blơi kơphê djơ̆ anŏ ñu đĭ dua wơ̆t laih anun anom bơwih ƀong tơnap biă či pơplih nua kiăo tui ƀơi anih sĭ mơdrô:“Kiăng pơkra gơnam na nao, khŏm hơmâo gơnam pioh pơkra. Bơ gơnam pioh lui či pơkra lơ̆m blơi nua ñu glăk pơmă, bơ mông anai nua ñu trun, ƀu dưi plih hlao mơtăm ôh. Hăng ƀing tuai blơi gơnam ta sui baih, ta khŏm hơmâo hră lăi pơthâo glăi, ƀu tañ tui hăng kơphê ba sĭ tui pơ anih sĭ mơdrô hrŏm ôh. Samơ̆ hăng mơnuih blơi yua lĕ khŏm plih hlao mơtăm, tui anun anom pơkra kơphê amra bơbeč lu biă”.

Ơi Lương Tiến Việt - pô sang anom bơwih ƀong kơphê jơman ƀơi să Đăk Tơ Ve, tơring glông Čư̆ Păh, tơring čar Gia Lai đao lăng hlâo, kơphê năng ai ñu trun dơ̆ng mơn pơ anăp anai. Yua hnun, kiăng huăi rơngiă prăk, anom bơwih ƀong kiăng blơi mă ƀiă, čom hơmâo djŏp mrô či kiăng đôč:“Hơdôm tal trun nua amăng hơdom hrơi mơtăm tơdơi kơ kơnuk kơna ta pơdơi ngă lơphet, samơ̆ mrô kơphê đĭ jai hrơi lu. Nua đĭ, trun kiăo tui nua pơkă hrŏm pơ anih sĭ mơdrô, jing anom bơwih ƀong khŏm blơi mơn. Khă hnun hai, blơi hăng pơhmư̆ lăng, blơi mơ̆ng rơnang, blơi ruah mă, ƀu djơ̆ blơi tuh rơyuh ôh. Yua dah anih sĭ mơdrô pơplih tañ ƀu thâo hlâo ôh”.

Ơi Phạm Văn Binh - Khua gơnong bruă tuh tia pơkra gơnam sĭ mơdrô Gia Lai brơi thâo, nua kơphê jing gơnam hơmâo lu hloh, rim thun pơgôp năng ai ñu 80% nua ba sĭ pơ čar rơngiao mơ̆ng tơring čar. Ơi Phạm Văn Binh lăi, ƀơi anăp nua gơnam đĭ trun, anom bơwih ƀong kiăng hơmâo hơdră ngă plai ƀiă huač prăk kăk, pơhlôm pơkra gơnam kơjăp:“Hăng anom bơwih ƀong blơi, pơkra, ba sĭ kơphê pơ čar rơngiao kiăng hmư̆ hing tong ten pơ anih sĭ  mơdrô, blơi sĭ tañ ƀiă. Tal dua, anih sĭ mơdrô kual Mi Kô̆ jing anih blơi sĭ kơphê prong, khŏm kiăng kơphê jơman, klă. Anun bruă blơi sĭ, pơkra khŏm pơmin kiăng hơđong, pơkra gơnam khŏm hơdjă. Pơtă hlâo kơ hơdôm bơnah gơñăm nao anŏ klă jơman. Hăng mơnuih ngă hmua lĕ tơlơi anai gơñu bưp lu laih, nua pơmă lĕ tuh pơ alin ngă hmua, nua trun lĕ rơngiă abih prăk. Anun jing kiăng ngă hmua prăp rơmet, pơmin tong ten, hơmâo hơdră pơđĭ kyar kơphê lăp djơ̆”./.