VOV4.Jarai - Ding jum ngă hmua hăng pơđĭ kyar ƀon lan phrâo gum hrŏm hăng Jơnum min mơnuih ƀon sang tơring čar Dak Lak pơphun Jơnum lăng glăi boh than ngă tui akŏ bruă pla glăi kơphê. Rơwang thun 2014-202, đơ đa tơring čar hơmâo pơphun pla glăi giăm 150 rơbâo ektar kơphê, rơgao 30 rơbâo ektar pơhmu tui tơlơi pơkă. Kơphê pĕ pơhrui tơdơi kơ pla glăi rơbêh 3 tă/ektar. Kơnong ƀơi Dak Lak ră anai hơmâo rơbêh 210.000 ektar kơphê, pơhrui rĭm thun rơbêh 520.000 tơ̆n kơphê asar krô.

Mơnuih ngă hmua Dak Lak pla glăi kơphê

Kơphê mơng Dak Lak lĕ anăn apăn sĭ mơdrô hmư̆ hing hăng hơmâo pơdah tong ten anih pla pơjing lĕ “kơphê Buôn Ma Thuột” glăk ba hyu sĭ ƀơi rơbêh 80 boh dêh čar hăng kual lŏn. Ding jum ngă hmua hăng pơđĭ kyar ƀon lan tŏ tui tŭ yap akŏ bruă pla glăi kơphê rơwang thun 2021-2025 hăng hơnong pơkă dưi bơkơtưn, rơnoh yôm, pơhrui hmâo hmăi brơi mơnuih ƀon sang. Đang hmua pla glăi kơphê, pơtlep than rơwang anai lĕ giăm 107.000 ektar.

Siu Đoan: Pơblang