Gơnam đang hmua ba nao pơ hơdôm siêu thị, anih anom sĭ mơdrô amăng dêh čar, Lâm Đồng hlăk kơtưn ĕp lăng, hruă kjăp bruă wai lăng kiăng thâo krăn anih ba sĭ mơdrô gơnam đang hmua amăng tơring čar. Lâm Đồng ră anai, hlăk hơmâo 5.700 ha đơ đam ngă hmua tui hơdră VietGap, đĭ tui giăm 320 ha đơ đam tŭ yap sit nik VietGap pơkă hăng thun hlâo. Tui hăng ơi Nguyễn Hà Lộc, Kơ-iăng Khua Gơnong bruă Ngă hmua hăng pơđĭ kyar plơi pla Lâm Đồng, hrơi blan giăm anai, hơmâo tơlơi pơhing lăi gơnam đang hmua blơi pơtum ƀơi sang sĭ mơdrô jưh hlâo, giong anun dưm amăng hruh kơdung, pơtep mă anăn VietGap laih anun ba hyu sĭ mơdrô amăng sang sĭ mơdrô prong siêu thị ƀơi ƀôn prong HCM.

Lâm Đồng hơmâo rơbêh 5.700 ha đơ đam hmua pla añăm pơtam tŭ yap VietGap

Tơlơi anai bơbeč djơ̆ tơlơi suaih pral kơ mơnuih blơi yua, laih anun kơnuih anăn sĭ mơdrô añăm pơtam Đà Lạt-Lâm Đồng. Anom bruă ngă hmua tơring čar kơtưn hăng pơtrut bruă mă hyu sem lăng, pel ĕp hăng krăo lăng tong ten djop anih ngă hmua pla añăm, pơkra ming, răk lui hăng sĭ mơdrô gơnam đang hmua VietGap amăng tơring čar, pơsir khut khăt hơdôm gơnam hơmâo anăn VietGap mơ̆ ƀu hơdjă, ƀu hiam tŭ yua sit nik.