Tơdơi kơ Jơnum min mơnuih ƀôn sang tơring čar Lâm Đồng hmâo tơlơi pơsit akô̆ bruă pơphô hlâo pơdŏng hơdôm hơdră tuai cuă lăng đang hmua ƀơi tơring čar amăng rơnuč thun 2015, truh thun 2018, gơnong bruă tuai čuă ngui tơring čar Lâm Đồng hmâo gum hrŏm laih hăng hơdôm bôh anom bơdjơ̆ nao pơphun pơsit hăng tŭ yap 33 bôh anih anom tuai čuă lăng đang hmua. Mơ̆ng anun, anih anom tuai čuă lăng đang hmua ƀơi tơring čar Lâm Đồng hmâo amăng ƀrư̆ ngă tui anô̆ gal, ngă pơhưč rơbêh kơ 7 klăk wot čô tuai nao čuă lăng hăng găn rơgao lăng, ba glăi prăk pơhrui glăi lăp yap ba kơ mơnuih ƀôn sang ƀơi anai.

Khă hnun hai, yua kơ bưp lu tơlơi gun yua kơ hơdôm tơlơi pơkă amăng tơlơi phiăn mă yua anai, ăt kah hăng akă hmâo hơdôm tơlơi pơtô brơi rơđah mơ̆ng bơnah hơdôm ding jum, gơnong bruă dêh čar hmâo bơdjơ̆ djơ̆ nao ba truh bruă pơplar tuai čuă lăng đang hmua ƀơi tơring čar Lâm Đồng bưp lu tơlơi tơnap. Biă ñu hơdôm tơlơi pơkă kơ tơhnal pơkă man pơdŏng ƀơi lŏn ngă đang hmua, pơplih lŏn ngă đang hmua jing lŏn dô̆, pơkă kual mă yua lŏn, rơnoh pơdong hmâo bơbung pơgang... Tui hăng yă Lê Thị Quỳnh Như, Blok đang Cún ƀơi phường 7, plơi prong Đà Lạt, hơdôm tơlơi akă gal anai ba truh bruă pơđĭ kyar tuai čuă lăng đang hmua ƀơi tơring čar kah hăng tơblut amăng tơlơi tơnap.

 “Đang hmua hmâo hlô rông, hlô rông amăng sang, hmâo rah gơnam phara mơ̆ng Đà Lạt kah hăng phun dâu tây, trong mơxăm, añăm pla amăng ia... lĕ ăt dưi hmâo lu tuai čuă ngui weh nao pioh čuă lăng, găn rơgao lăng. Khă hnun hai, khom hmâo anih jưh rơdêh, kual pla gơnam, kual pơdă prưng, kual čơkă tuai, kual sang juă glai, anih sĭ ia mơñum... hơdôm ring bruă anai khom hmâo pioh čơkă tuai, samơ̆ lơm pơkra lĕ gun kơ anih anom  hơđong man pơdŏng”.

Pơhiăp amăng mông klah čun, ơi Phạm S, Kơ-iăng Khua Jơnum min mơnuih ƀôn sang tơring čar Lâm Đồng pơtong sit, tơhnal gal pơđĭ kyar tuai čuă lăng đang hmua mơ̆ng tơring čar lĕ prong biă, samơ̆ lơm pok pơhai ngă tui bưp lu tơlơi gun, amăng anun tơnap tap prong hloh lĕ hơdôm Tơlơi phiăn tuai čuă ngui, Phiăn lŏn drŏn hăng Tơlơi phiăn man pơdŏng. Kiăng pơtrut tuai čuă lăng đang hmua pơđĭ kyar kơtang, hmâo tơhnal pơplih pơ̆ anăp anai, tơring čar glăk črâo ba hơdôm ƀirô apăn bruă man pơdŏng jơlan gah mă yua lŏn lu mơta pơkă kơ tuai čuă lăng đang hmua hmâo hrŏm hơdôm tơlơi pơkă rơđah rơđông, tong ten lăi pơthâo kơ gưl hmâo tơlơi dưi pơsit. Bruă anai ngă tui hluai tui Phiăn lŏn drŏn thun 2024 hăng hơdôm hră pơ-ar pơkă rơđah ngă tui hmâo bơdjơ̆ nao. Ơi Phạm S, brơi thâo:

“Hơdôm rơwang bruă tuai čuă lăng đang hmua hmâo lŏn pơdŏng ƀudah sa rơwang bruă ha jăn thơ rơkâo lĕ pơdŏng tui sa rơwang bruă tuh pơplai hăng mơ-ĭt kơ Gơnong bruă kơčăo bruă hăng tuh pơplai pơsit pel ĕp tui djơ̆ akô̆ tlôn. Ƀut tal 2 lĕ lŏn ngă đang hmua hơđăp mơ̆ ƀing ta mă yua lu bôh than yua kơ pô lĕ mơ-ĭt kơ Anom wai lăng kông ngăn glai klô hăng rơhuông adai lŏn mơnai, Jơnum min mơnuih ƀôn sang hơdôm gưl pơsit. Hăng lŏn ngă đang hmua lu mơta yua kơ khul mơnuih mă yua lĕ ăt čih pơkra mơn abih bang bôh yôm mơ-ĭt kơ Gơnong bruă kông ngăn glai klô hăng rơhuông adai lŏn mơnai pơsit, lăi pơthâo kơ ƀirô hmâo tơlơi dưi pơsit. Dua bôh yôm anai phara, sa lĕ rơwang bruă hmâo pơplih bôh than man pơdŏng, anô̆ dô̆ glăi lĕ lŏn mă yua lu mơta pơdŏng ring bruă tui hơdră ruh hăng rap glăi, ƀu hmâo pơplih bôh than yua kơ ñu lĕ lŏn ngă đang hmua”.

Ơi Phạm S jao kơ Gơnong bruă, Anom bruă, tơring glông, plơi prong bơdjơ̆ nao, pel ĕp glăi hơdôm anih anom tuai čuă lăng đang hmua dưi tŭ yap, pơtô brơi hơdôm bôh anom pơhrua nao, ngă giong hơdôm tơlơi kiăng pioh rơkâo pơsit hăng tŭ yap hơdră tuai čuă lăng đang hmua; ruah mă tơlơi gum pơhiăp, ba tơbiă mơ̆ng khua pơ ala pioh pơhrua nao, ngă giong hơdôm bôh yôm, tơhnal ba tơbiă hăng lăi pơthâo glăi Jơnum min mơnuih ƀôn sang tơring čar pel ĕp, pơhrua nao, pơplih pơkra pơkă lăp djơ̆ hăng tơlơi hmâo sit, kiăng ngă tui dong hơdôm tơhnal gal, pran kơtang hmâo ră anai, pơđĭ kyar bruă tuai čuă lăng đang hmua tui djơ̆ jơlan gah hmâo ba tơbiă./.