VOV4.Jarai-Hơdôm thun hăng anai, lu sang anŏ mơnuih ƀôn sang djuai ania Kơtu dŏ pơ să kual čư̆ siăng Hòa Bắc, tơring glông Hòa Vang, ƀôn prong Đà Nẵng tuh pơ alin kơ bruă pla kyâo glai, ba glăi boh tŭ yua pơhrui prăk kăk lu, djru mơnuih ƀôn sang hrưn đĭ pơklaih ƀun rin, hơđong tơlơi hơdip mơda. Samơ̆, mơnuih ƀôn sang ngă bruă pla hăng wai lăng kyâo glai, pla phun kyâo Mi pơgang hŭi lŏn tơhlom mơ̆ng čư̆, pơgang anăm brơi arăng ngă sat kơ glai klô.

Phrâo anai, Jơnum min mơnuih ƀôn sang ƀôn prong Đà Nẵng ngă hră pơtrun, djru prăk, pơtrut ană plơi pla ngă bruă pơgang glai, pla kyâo pơtâo pơprong čang rơmang pơhrui glăi boh tŭ yua lu, djru pơđĭ kyar bơwih ƀong huă, laih anun pơgang ayuh hyiăng anih hơdip jum dar.

Hlâo adih, amai Hồ Thị Thanh Tỏa, dŏ pơ plơi Tà Lang, să Hòa Bắc, tơring glông Hòa Vang tŭ mă đơ đam glai kơnuk kơna jao pla 5 ha kyâo. Yua thâo ngă tui ia rơgơi, hơdră pla kyâo, wai lăng djơ̆ anŏ glai klô đang phun kyâo mi ñu đĭ hiam biă mă. Thun koh kyâo mi uă ngă hơnăl thun anai, sang anŏ amai Tỏa hơmâo sĭ pơhrui truh 350 klăk prăk. Ñu lăi, yua pla kyâo amăng glai, sang anŏ ñu hơđong ƀiă laih tơlơi hơdip mơda, hơmâo prăk pơdong sang, blơi rơdêh thut, blơi tivi či lăng, laih anun gơnam yua mă bruă kơ sang anŏ djop mơ̆n.

Ră anai, amai Hồ Thị Thanh Tỏa dŏ jak iâu, pơtô brơi mơnuih ƀôn sang djuai ania Kơtu gơñu pơđĭ kyar bruă pla kyâo glai wai lăng ayuh hyiăng.

“Mơnuih ƀôn sang djuai ania Kơtu tơnap biă mă, hơmâo kơčăo bruă djru mơ̆ng kơnuk kơna jao lŏn, jao glai rưng mơnuih ƀôn sang pla kyâo pơđĭ kyar biă mă, jai hrơi đĭ đăi gŏ amŏ. Jing djuai ania Kơtu kâo jak iâu hăng pơtô lăi mơnuih ƀôn sang pla kyâo glai, anun ƀu hơmâo sang anŏ rin ƀun dơ̆ng tah. Amăng  thun anai sang anŏ pơblih pla kyâo pơprong dơ̆ng, sui thun kah dưi uă kyâo”.

Uă kyâo phrâo anai, sang anŏ amai Tỏa pơhrui glăi 350 klăk prăk

Ră anai, giăm 200 boh sang anŏ mơnuih djuai ania Kơtu dŏ pơ să Hòa Bắc hơmâo tơlơi hơdip đĭ đăi gŏ amŏ yua pla kyâo wai lăng glai. Mơnuih djuai ania Kơtu pơ anai ƀu hơmâo čông jơnah jah glai, uă kyâo ôh ngă hmua hang ôh, thâo ngă pơdrong pla kyâo amăng kual lŏn glai plơi pla gơñu pô. Ayong Nguyễn Văn Lâm, dŏ pơ să Hòa Bắc brơi thâo, laih hơmâo ƀiă prăk tuh pơ alin tơlơi hơdip mơda hơđong yơh, sang anŏ pơblih bruă pla kyâo pơprong sui thun, lui hĭ pla kyâo mi.

“Ră anai kyâo glai đĭ hiam biă mă, hơdôm sang anŏ uă kyâo pla pơhrui glăi prăk truh 300 klăk prăk, ăt hơmâo anŏ ƀong huă gơnam djă pioh. Phrâo anai dơ̆ng, hơmâo jơlan hơdră mơ̆ng kơnuk kơna pơtrut ană plơi pla brơi pla kyâo glai kyâo pơprong, kyâo giăr, kiăng djru ană plơi pla pơđĭ kyar hơđong pơkă hăng pla kyâo mi ƀiă thun. Pla kyâo pơprong sui thun lĕ rơnoh bơwih ƀong amra lu hloh”.

Lơ̆m hơmâo prăk tuh pơ alin hơđong yơh bruă mă, ayong Nguyễn Văn Lâm pơblih pla kyâo pơprong pơhrua kyâo mi ƀiă thun

Tơring glông Hòa Vang, ƀôn prong Đà Nẵng hơmâo rơbêh 17 rơbâo ha lŏn glai hăng lŏn ngă hmua pla pơjing. Rơngiao kơ kơ jơlan hơdră djru mơ̆ng Kơnuk kơna, gong gai kơnuk kơna djop gưl ngă gêh găl hăng djru kơ ană plơi hơmâo tơlơi gêh găl ngă hmua pla pơjing. Lu sang anŏ čan prăk kơmlai ƀiă pioh pơtrut pơđĭ kyar bruă pla kyâo amăng glai, anun tơlơi hơdip mơda dưi pơblih phrâo hăng pơđĭ kyar rơđah hloh. Rĭm wơ̆t koh kyâo mi, hơmâo sang anŏ pơhrui glăi mơ̆ng 200 klăk truh 400 klăk prăk. Ơi Hồ Phú Thanh, Kơ-iăng Khua Jơnum min mơnuih ƀôn sang să Hòa Bắc, tơring glông Hòa Vang, ƀôn prong Đà Nẵng brơi thâo, dơ̆ng mơ̆ng hơmâo jơlan hơdră jao lŏn glai mơ̆ng kơnuk kơna, mơnuih ƀôn sang tŭ mă wai lăng hăng pla kyâo yơh:

“Bruă pơblih hơdră pla kyâo mơ̆ng hmua pla kyâo mi ră anai, lu sang anŏ hơmâo hrưn đĭ amăng tơlơi hơdip mơda, pơklaih mơ̆ng ƀun rin laih anun lu sang anŏ ngă pơdrong tui. Lu sang anŏ khin hơtai pơblih lui pla kyâo mi, pla kyâo pơprong sui thun pioh uă kyâo ngă hnăl, gong gai kơnuk kơna djru prăk tuh pơ alin pơđĭ kyar pla kyâo pơprong tơdơi anai”.

Ƀôn prong Đà Nẵng ngă hră pơtrun djru, pơtrut mơnuih ƀôn sang

pla kyâo pơprong

Phrâo anai, Jơnum min mơnuih ƀôn sang ƀôn prong Đà Nẵng ngă hră djru, pơtrut mơnuih ƀôn sang pla kyâo pơprong. Ră anai, hơmâo 41 anom bruă, sang anŏ čih anăn ngă hrom pla kyâo glai pơprong hăng đơ đam giăm truh 800 ha. Ơi Trần Viết Phương, Kơ-iăng Khua gơnong bruă Đang hmua hăng Pơđĭ kyar plơi pla ƀôn prong Đà Nẵng brơi thâo: Kiăng kơ jơlan hơdră pơđĭ kyar pla kyâo glai pơprong dưi truh pơ mơnuih ƀôn sang ngă hrom, Gơnong bruă anai rơkâo kơ khua jơnum min ƀôn prong tŭ ư hơdră djru lu črăn. Tui hăng anun, tal 1 anai, ƀôn prong pioh 5 klai prăk djru mơnuih ƀôn sang pla kyâo pơprong.

“Ngă tui hơdră pơtrun mrô 254 mơ̆ng Jơnum min pơ ala mơnuih ƀôn sang ƀôn prong kơ jơlan hơdră djru ană plơi pla pla kyâo glai, djuai kyâo pơprong ƀơi Đà Nẵng. Tal anai pơkra hơdră pơdah đĭ hăng Jơnum min mơnuih ƀôn sang djru tal 1, pla phrâo 12 klăk ha, pơblih tui 8 klăk ha. Hlâo adih năng ai 4,5 thun koh yơh kyâo, ră anai pla kyâo pơprong 10 thun pơdlông kah dưi koh, uă kyâo, sit mơ̆n rơnoh prăk bơwih ƀong huă amra đĭ lu hloh kơ anun”.

VOV Kual Tong krah čih-Nay Jek: Pơblang