VOV4.Jarai - Tơdơi kơ 15 thun ngă tui tơlơi pơtrun mơng gơnong glông lok 7 tal 10 kơ bruă ngă hmua, mơnuih ngă hmua, ƀon lan amăng dêh čar hơmâo ba glăi lu tơlơi dưi prong prin, ba glăi lu tơlơi yôm, djop mơta. Bruă bơwih ƀong, sĭ mơdrô gơnam đang hmua glăk hơdai naogơnam hiam hơdjă hăng sĭ nua yôm, hluai tui ayuh hyiăng pơplih. Samơ̆, bruă pok pơhai ngă tui tơlơi pơtrun amăng thun blan laih rơgao ăt dŏ lu anŏ aka ƀu klă. Amăng jơnum gơnong glông lok 5, Khul apăn bruă Ping gah dêh čar hơnâo pơčrông sat kơ akŏ bruă klah čun 15 thun ngă tui tơlơi pơtrun mơng Jơnum gơnong glông lok 7 tal X kơ ngă hmua, mơnuih ngă hmua, ƀon lan. Tui anun, bruă kơsem min, mă yua boh thâo măi mok phrâo, pơplih phrâo, mơnuih mă bruă thâo rơgơi aka ƀu jing tơlơi pơtrut pơsur phun kiăng kơ tañ pơđĭ kyar….Tơlơi anai kiăng ba tơbiă tơlơi pơtrun phrâo kiăng tŏ tui pơsit tong tơlơi yôm phun mơng bruă ngă hmua, mơnuih ngă hmua, ƀon lan hăng bruă pơđĭ kyar lŏn ia.

Tŏ tui pơsit tong anih gơnang nao, tơlơi gơgrong akŏ phun mơng ngă hmua, mơnuih ngă hmua, ƀon lan hăng bruă pơđĭ kyar lŏn ia, Tơlơi pơtrun mơng Jơnum Ping gah đơ đam dêh čar tal 13 lăi rơđah: Pơtrut pơplih ngă hmua, pơđĭ kyar bơwih ƀong huă ƀon lan pơlir hăng man pơdong plơi pla phrâo. Pơđĭ kyar ngă hmua ba glăi gơnam tam sĭ mơdrô đing nao lu hloh tui jơlan hơdră phrâo, mă yua boh thâo măi mok, đĭ tui rơnoh yôm hăng pơđĭ kyar hơđong kjăp. Pơsur pơđĭ kyar ngă hmua mơtah, agaih, ngă hmua sinh thái, ngă hmua hơdjă, ngă hmua mă yua boh thâo măi mok, thâo rơgơi, ngă hmua mă yua boh thâo phrâo, bong glăi anŏ pơplih sat mơng ayuh hyiăng rơhuông adai. Tŏ tui pok pơhai jơlan hơdră tui hơnong pơkă dêh čar amăng man pơdong plơi pla phrâo tui jơlan hơdră man pơdong plơi prong, jai hrơi dơlăm, tŭ yua, hơđong kjăp. Ngă tui bruă man pơdong plơi pla phrâo hrưn đĭ dong, plơi pla tui kru phrâo hăng man pơdong plơi pla phrâo ƀơi plơi pla ala ƀon. Pơjing hơdră pơhlôm brơi gơnam ƀong huă amăng dêh čar amăng rơnuk phrâo. Ƀơƀrư̆ ngă giăm tui bruă tŭ mă hơdră djru kơplah wah plơi prong hăng ƀon lan, kơplah wah kual čư̆ siăng hăng abih bang mơnuih ƀon sang…

Mông jơnum gơnong glông lok 5 tal XIII

Pơdah pran hur har mơ-ak lơ̆m Jơnum gơnong glông lok 5 anai pơčrông sai hơdôm bruă yôm phun amăng lŏn ia, amăng anun bơdjơ̆ nao bruă ngă hmua, mơnuih ngă hmua, ƀon lan, ơi Nguyễn Trí Ngọc, Kơ-iăng khua khul ngă hmua hăng pơđĭ kyar ƀon lan Việt Nam brơi thâo:

“Ƀing gơmơi čang rơmang Tơlơi pơtrun phrâo amra pơdah tơlơi gir run mơng djop anih anom kơđi čar hăng bruă ngă hmua, mơnuih ngă hmua, ƀon lan. Kiăng tơlơi pơtrun phrâo dưi mă yua sit nik, ƀing gơmơi pơmĭn kiăng kơ hơmâo hơdră pơplih phrâo. Kơnong amăng bruă ngă hmua lăi hrŏm, bruă pla pơjing hnun mơn, ƀing gơmơi ƀuh kiăng pơplih phrâo amăng čih pơkra Tơlơi phiăn kơ lŏn mơnai, yua hơdôm hơdră wai lăng lŏn mơnai lĕ yôm biă mă kiăng pơđĭ kyar amăng ngă hmua, sit biă ñu lĕ pơđĭ kyar ngă hmua ba glăi gơnam tam sĭ mơdrô lơ̆m ƀing ta pơplih tơlơi pơmĭn mơng pla pơjing hơdai nao bơwih ƀong ngă hmua ba glăi pơhrui lu ƀiă dong”.   

Kiăng pơsit tong ngă hmua lĕ gơnong bruă gơnang nao amăng bruă bơwih ƀong huă, lơ̆m hơdôm tơlơi dưi amăng bruă ngă hmua, mơnuih ngă hmua, ƀon lan hơmâo pơgôp prong prin amăng hơdôm tơlơi dưi, yôm phăn amăng bruă pơplih phrâo amăng thun blan laih rơgao, Khua ding jum ngă hmua hăng pơđĭ kyar ƀon lan Lê Minh Hoan brơi thâo, amăng thun blan dêh čar ta hăng jar kmar hơmâo lu tơlơi pơplih prong, bruă pơjing hăng wai pơgang lŏn ia amăng rơnuk phrâo kiăng hrưn đĭ kiă dong lơ̆m ngă tui hơdôm bruă jao pơđĭ kyar ngă hmua, mơnuih ngă hmua, ƀon lan. Klin Covid-19 phrâo rơgao lĕ tơlơi pơhmutu tong ten hloh kơ bruă hơdeč hmar hăng tơlơi gơgrong mơng gơnong bruă amăng rơnuk phrâo. Yua anun yơh, kiăng kơ pơhlôm dưi ngă hơdôm hơnong pơkă pơđĭ kyar hơđong kjăp, bruă pơplih hơbô̆ bruă kơtưn đĭ tui rơnoh mơng ngă hmua jing sa tơlơi rơkâo ječ ameč hăng kiăng hloh ră anai.

“Kiăng kơ pơplih phrâo ba glăi tơlơi dưi sui thun hăng hơđong kjăp lĕ kiăng hơdôm tơlơi thâo thăi phrâo, hơdôm tơlơi pơmĭn pơhrăm mơng hơdôm tơlơi găn rơgao sit nik hluai tui hơdôm tơlơi sit nik amăng rŏng lŏn tơnah, bruă mă ƀơi ƀon lan. Tơlơi pơčeh phrâo mơng 1 čô mơnuih samơ̆ kiăng pok pơhai ngă tui tơlơi sit nik, ăt kiăng tơlơi gum tơngan hrŏm mơng abih bang mơnuih. Amăng hrơi blan pơplih tañ, hur har amăng bruă ngă hmua, ƀu djơ̆ kơnong hơmâo 1 čô mơnuih đôč ôh mơ̆ kiăng lu mơnuih mut hrŏm, tơlơi gum djru, dong yua mơng djop Ding jum, gơnong bruă hăng ƀon lan, djop khul grup, abih bang mơnuih, djop anom bruă amăng lŏn ia hăng tač rơnigao.”.

Tui hăng ơi Lương Quốc Đoàn, Khua Khul mơnuih ngă hmua Việt Nam, kiăng mơnuih ƀon sang pơplih tơlơi pơmĭn amăng ngă hmua hơdai nao bơwih ƀong sĭ mơdrô gơnam đang hmua djop gưl amăng Khul kiăng pơtô pơblang brơi mơnuih ƀon sang kiăng thâo dongkah mơng dưi pơplih. Anăm pơgô̆ kiăng mơnuih ngă hmua pơplih mơtăm mơ̆ tơlơi pơmĭn, bruă mă ăt dŏ tŏ hơđăp, ơi Lương Quốc Đoàn brơi thâo:

“Tơdah kiăng mơnuih ƀon sang pơplih tơlơi pơmĭn kiăng pơtrut ba glăi hơdôm tơlơi dưi phrâo mơng mơnuih ngă hmua. Kiăng kơ pơtô brơi mơnuih ƀon sang thâo kah mơng dưi pơplih mơ̆ anăm pơgô̆ kiăng pơplih mơ̆ tơlơi pơmĭn, bruă mă ăt dŏ tui hơđăp, tơlơi ania ngă tơnap kơ bruă pơđĭ kyar, pơplih phrâo. Yua anun, djop gưl kiăng gum hrŏm kjăp hăng djop ding jum, gơnong bruă, djop khul grup, anom bơwih ƀong sĭ mơdrô, djop anih anom kiăng kơ hluai tui tơlơi thâo thăi phrâo, jak iâu gum pơgôp kiăng pơtô hrăm, pơblang brơi mơnuih ngă hmua thâo hluh ƀiă dong, mơng anun amra dưi ngă mă hơjăn hăng tŏ tui lĕ ƀing ngă pô. Lơ̆m mơnuih ƀon sang thâo ƀing gơñu lĕ akŏ phun hăng amra gơgrong bruă ngă hmua, mơnuih ngă hmua, ƀon lan amra pơđĭ kyar./.

Siu Đoan: Pơblang