VOV4.Jarai - Nua kmơk pruai, gơnam čem rông hlô, ăt ka hăng gơnam tam, măi pioh ngă hmua pơmă tui mơn jing ngă lu mơnuih ngă hmua ƀơi Dak Lăk tơnap tap. Khă hnun, ƀơi lu plơi pla, mơnuih ngă hmua, anom bơwih ƀong “pơtaih tơnap tap” mă pô hăng bruă mă yua djah djâo gơnam mơng hmua pơđăm pơbrŭ ngă kmơk pruai, ngă hmua pơdar nao rai đah mơng plai ƀiă rơngiă prăk.

Ơi Đỗ Hữu Minh, dŏ ƀơi plơi Tân Phú, să Ea Ñuôl, tơring glông Buôn Đôn hơmâo rơbehe 2 ektar đang kơphê, tiu hăng pla plah phun boh troh dong. Ñu brơi thâo, rim thun sang anŏ khŏm mă yua mơng 30 truh 40 klăk prăk blơi kmơk pruai. Lơ̆m nua kmơk pơmă, ñu mă djah amăng đang pơbrŭ ngă kmơk. Rơbêh ha thun anai, ñu mă yua kmơk vi sinh pơđăm mơng kơđuh kơphê, tiu, hơkam pruai kơ phun pla, ƀu kơnong ngă brơi lŏn ñu hyôk, pơgang ayuh hyiăng đôč ôh mơ̆ ăt plai mơn hrŏ prăk: “Hlâo adih pruai kmơk NPK, kmơk jrao samơ̆ ră anai pruai kmơk pơbrŭ hăng djah soh yơh, arăng iâu vi sinh. Kmơk vi sinh kâo pơkra mơng phun kyâo, pơđăm jing kmơk pruai klă biă. Kơ kmơk jrao rim thun ta pruai rơngiă 35 klăk prăk samơ̆ mơng hơmâo kmơk vi sinh rơngiă mă 4 truh 5 klăk dưi pruai djŏp brơi 2 ektar đang mơtăm”.

Hăng Anom ngă ƀong hrŏm bruă hmua hăng tuai hyu ngui Phú Nông Buôn Đôn, tơring glông Buôn Đôn, bruă mă yua djah gơnam mơng hmua pioh ngă hmua hơmâo mơnuih amăng anom bruă ngă rơguăt laih. Bruă pơkra djơ̆ akŏ tlôn, abih bang djah hơmâo mă yua glăi dong. Ơi Trần Văn Toàn, Khua anom ngă ƀong hrŏm brơi thâo, hơbô̆ bruă bơwih ƀong mă yua pơdar nao rai jing pơkra rai gơnam rơnuk rơnua, klă, plai mơn rơngiă prăk, biă ñu huăi ngă kơƀak kơ ayuh hyiăng:

“Kiăng plai ƀiă hrŏ prăk pơkra gơnam lĕ mơng bruă rông hlô ta mă yua eh ñu pioh rông rơnăng, mă rơnăng čem mơnŭ, bip, brơi akan ƀong, tui anun plai ƀiă mơn hrŏ prăk. Gir pơtô brơi mơnuih ngă hmua tui hơdră mă yua nao mă yua rai tui anun plai mơn rơngiă prăk, prăk pơhrui lu mơn, gơnam pơkra ăt klă mơn, djơ̆ hăng hơnong pơkă mơn”.

Ơi Đỗ Hữu Minh mă yua eh pai rông rơnăng.

Kơđuh kơphê hơmâo pơđăm bơbrŭ ngă kmơk.

Bruă ngă hmua ăt jing hơdră mơ̆ lu anom bơwih ƀong ƀơi Dak Lăk ngă đah mơng dưi bơwih ƀong ƀơi anăp nua kmơk pơmă, laih dong anăp nao bruă ngă hmua mơtah hơđong kơjăp, plai mơn mă yua kmơk jrao, jrao pơgang phun pla. Ơi Phạm Hữu Thời, Khua kông ti TNHH ngă hmua Nhất Thống, anom bruă pơkra, ba sĭ gơnam hơdjă brơi thâo:

“Pơkra gơnam hơdjă lĕ ngă hmua mă mă yua glăi djŏp gơnam dưi yua mơng đang hmua, huăi bơngơ̆t kơ nua kmơk đĭ trun ôh. Yua dah amăng bruă pơkra kmơk, gơnam čem rông ƀơi anih, ăt kah hăng dưi ngă tui tơlơi pơkă ngă hmua hơdjă lĕ pơkra rai gơnam klă khŏm hơmâo ƀiă biă mă ñu 50% kơ bruă rông hlô ăt kah hăng kmơk pruai phun pla.

Dak Lăk jing tơring čar ngă hmua pơkra lu mơta gơnam biă, anun jing mrô djah lu mơn. anai jing tơlơi gêh gal dưi pơđĭ kyar bruă hmua hơđong dưi mă yua lok nao lok rai. Hơbô̆ bruă bơwih ƀong pơdar nao rai dưi pơkra gơnam rơnuk rơnua, klă, plai mơn ngă hơƀak ayuh hyiăng. Biă ñu amăng hrơi blan nua gơnam ngă hmua pơmă tui ră anai, bruă mă yua djah mơng hmua pioh ngă hmua amra plai biă hrŏ prăk.

Hương Lý: Čih - Siu H’Mai: Pơblang