VOV4.Jarai-Ƀơi tơring glông Krông Pač, tơring čar Dak Lak phrâo anai pơphun jơnum pôr pơthâo sĭ mơdrô sit nik, mrô gơnam boh sầu riêng blung a tui Hră pơtrun kĭ pơkôl plah wah Ding jum Bruă hmua hăng Pơđĭ kyar plơi pla Việt Nam hăng Anom bruă wai lăng mă jia sĭ mơdrô dêh čar Khač. Tal jơnum anai, pok prong tơlơi gêh găl kơ bruă sĭ mơdrô boh sầu riêng mơ̆ng Việt Nam dưi ba nao djơ̆ jơlan phun tui hăng Hră pơtrun hơmâo kĭ pơkôl dua bơnah Việt Nam hăng Khač, pơgiăng nao blung a 300 tơn boh sầu riêng pla ƀơi Dak Lak.

Anai lĕ anih anom hơmâo hmua pla boh sầu riêng prong dong tal dua amăng dêh čar, tơdơi kơ Tiền Giang năng ai 15 rơbâo ha, thun 2022 pơhrui glăi 170 rơbâo tơn. Ơi Y Giang Gry Niê Knơ̆ng, Kơ-iăng Khua tơring čar Dak Lak hok mơak brơi thâo, ră anai, tơring čar dưi hơmâo anom bruă mă jia dêh čar Khač pơsit brơi 4 gru mrô, sang bruă dưi anung gơnam sĭ mơdrô hăng 23 gru mrô kual pla boh sầu riêng, jing ha mơkrah kual pơkă hăng amăng dêh čar.

Nay Jek: Pơblang