Sang anŏ ƀun rin amăng ƀuôn Čư̆ Kanh, să Ea Sin, tơring glông Krông Buk, tơring čar Dak Lak, akŏ thun 2023, yă H’Yam Mlô, hơmâo arăng djru brơi 1 drơi rơmô ania kiăng rông pơklaih mơng ƀun rin. Găn rơgao giăm 2 thun, hăng tơlơi đing nao mơng khul grup, sit biă ñu tơlơi črâo ba mơng ƀing apăn bruă gah wai lăng hlô rông amăng bruă rông rơmô, truh ră anai, sang anŏ yă H’Yam hơmâo dong 1 drơi ană ƀe phrâo tuh. Yă H’Yam hok mơ-ak brơi thâo:

“Sang anŏ gơmơi hơmâo kơnuk kơna djru brơi rơmô ania, ră anai rơmô tuh hrôh laih, kâo gir kơtir čem rông brơi klă hloh, bơni kơ kơnuk kơna hơmâo djru brơi ƀing mơnuih tơnap tap kah kâo anai, djru brơi djop mơta kiăng dưi pơplih tơlơi hơdip hiam klă ƀiă dong”.

Pơsit tong tơlơi gal mơng ƀon lan hăng hluai tui hơdôm tơlơi pơtrun mơng khul apăn bruă Ping gah djop gưl kơ pơhrŏ trun ƀun rin hơđong kjăp, Ping gah să Ea Sin, tơring glông Krông Buk, tơring čar Dak Lak hơmâo tơlơi pơtrun git gai pơđĭ kyar bơwih ƀong huă rơwang thun 2020-2025. Amăng anun, ba tơbiă hơnong pơkă, bruă jao, hơdră bruă tong ten, lăp djơ̆ hăng tơlơi gal amăng plơi pla. Pơplih hơdră ngă tui brơi dơlăm ƀiă, ba glăi tŭ yua ƀiă dong. Hrŏm hăng anun, pơtrut pơtô pơblang, pơsur mơnuih ƀôn sang mă yua boh thâo phrâo amăng pla pơjing, rông hlô, mă yua pơjeh, hlô rông phrâo kiăng pơhrui glăi hmâo hmăi amăng bơwih ƀong huă. Ơi Vũ Văn Tuấn, Khua git gai Ping gah să brơi thâo:

“Să Ea Sin hơmâo ngă tui klă akŏ bruă kiăng pok pơhai ngă tui amăng rĭm thun. Amăng hrơi blan ngă lăng ană mơnuih lĕ phun, ngă tui tơlơi gơgrong mut hrŏm mơng djop anih anom kơđi čar. Găn rơgao hơdôm thun bruă pơhrŏ trun ƀun rin ba glăi boh tŭ yua tong ten. Sit biă ñu lĕ tơlơi pơmĭn mơng mơnuih ƀôn sang amăng bruă pơhrŏ trun ƀun rin hrưn đĭ tong ten, mơnuih ƀôn sang thâo ngă tui hơdôm hơbô̆ bruă, bruă ngă klă, hrăm nao rai kiăng hrưn đĭ pơklaih mơng ƀun rin. Hơmâo lu sang anŏ hrưn đĭ pơdrong asah”.

Hrŏm hăng anun, mơng rơnoh prăk čan mơng hơdôm jơlan hơdră pơhrŏ trun ƀun rin, ia hơdjă, wai pơgang jum dar, prăk čan mơng hơdôm sang bruă prăk ngă gêh gal brơi mơnuih ƀôn sang dưi tuh pơ alin pơđĭ kyar bơwih ƀong huă. Truh ră anai, mrô sang anŏ ƀun rin amăng să Ea Sin hơmâo hrŏ trun mơng rơbêh 57% (thun 2021) dŏ 39,8% (thun 2023), pơhrui rĭm akŏ mơnuih ăt đĭ tui ƀơƀrư̆ amăng rĭm thun.

Mơng hơbô̆ bruă “Pơhrŏ trun ƀun rin hơđong kjăp” ƀơi să Ea Sin, Khul apăn bruă Ping gah tơring glông Krông Buk, tơring čar Dak Lak hơmâo pok pơhai, pok prong ƀơi hơdôm boh ƀon lan amăng tơring glông. Kiăng jê̆ giăm hăng plơi pla, Khul apăn bruă Ping gah tơring glông ăt pơpha bruă brơi ƀing apăn bruă rĭm blan glăi jơnum pơƀut hrŏm amăng plơi pla kiăng thâo tơlơi čang rơmang mơng ƀing apăn bruă, Ping gah hăng mơnuih ƀôn sang, hmao tlôn pơsir hĭ tơnap tap, gun găn amăng pơđĭ kyar bơwih ƀong huă ƀơi ƀon lan. Ơi Nguyễn Hải Đông, Khua git gai Ping gah tơring glông Krông Buk, tơring čar Dak Lak brơi thâo:

“Tơring glông hơmâo git gai ƀing apăn bruă tui bruă jao kiăo tui lăng hơdôm boh ƀon lan kah hăng ƀing apăn bruă 7 boh să nao jơnum pơƀut hrom amăng ƀon lan. Kiăo tui lăng na nao hăng sem lăng boh than ngă tui hơdôm hơnong pơkă, boh tơhnal kiăng ngă tui jơlan hơdră, tơlơi pơtrun djru pơklaih mơng ƀun rin kiăng jai hrơi klă ƀiă dong”.

Tơring glông Krông Buk, tơring čar Dak Lak ră anai hơmâo rơbêh 30 khul  Ping gah hăng rơbêh 180 grup dong amăng khul Ping gah ƀon lan. Yua ngă tui klă tơlơi git gai, črâo ba amăng pơđĭ kyar bơwih ƀong huă mơnuih mơnam amăng ƀon lan, yua anun 16 grup hơnong pơkă pơđĭ kyar bơwih ƀong huă, mơnuih mơnam amăng tơring glông thun 2023 dưi ngă hăng rơgao hơnong pơkă. Amăng anun mrô sang anŏ ƀun rin hrŏ trun 1% (dưi ngă 100% tui pơkă); mrô sang anŏ ƀun rin să tơnap tap hloh hrŏ trun 6,97% (dưi ngă 116% tui pơkă). Tơring glông ăt hơmâo akŏ pơjing 74 hơbô̆ bruă mă yua boh thâo phrâo, măi mok phrâo, pơjeh, hlô rông phrâo ba glăi tŭ yua amăng bơwih ƀong huă. Tơlơi hơdip kơ mơnuih ƀôn sang jai hrơi hơđong. Mơng anun, pơgôp ngă truh kih tơlơi pơtrun mơng Jơnum Ping gah tơring glông Krông Buk, rơwang thun 2020-2025 ba tơbiă, pơjing plơi pla jai hrơi pơđĭ kyar./.