VOV4.Jarai - Mơng thun 2017 truh 2021, hăng tơlơi gir run mơng abih bang anom bruă čar wơ̆t hăng mơnuih ƀon sang, tơring čar Gia Lai hơmâo pla 31.000 ha glai rưng, pla lu ƀơi anih mơnuih ƀon sang gô̆ mă lŏn glai gơñu pơhaih mă pô. Samơ̆, tui hăng tơlơi krăp lăng mơng Jơnum min khua pơ ala mơnuih ƀon sang tơring čar Gia Lai, ƀơi sa dua boh tơring glông, bruă pla glai amăng rơwang thun anai aset biă, yua dah phun kyâo glai djai lu, hơmâo anih kyâo djai trug 90%.

Thun 2020, sang anŏ ayong Jiao Klong hăng 300 boh sang anŏ ƀơi să Ia Rsai, tơring glông Krông Pa hơmâo iâu pơthưr pla 417 ha glai rưng keo ƀơi lŏn hmua, mơng hơđăp gơ̆ lŏn glai. Lơ̆m tơguan phun keo prong, hơdôm boh sang ăt pla thim pơdai, hơbơi plum dong kiăng hơmâo prăk. Tơdơi kơ 2 thun, ƀơi 150 ha phun keo djai rơrŭ, hơdôm pluh ha kơnong dưi hơdip yŭ kơ 50% đôč. Tui hăng glai rưng mơ̆ sang anŏ ayong Jiao Klong pla, phun dŏ hơdip aka ƀu truh 10%, anun jing ƀu dưi ƀong prăk apah pla glai ôh:

“Ƀing gơmơi ăt pơmin či pla phun kyâo mơn, samơ̆ lŏn pơ anai ƀu dưi pla ôh, lêng kơ lŏn krô krañ, pla phun hơget tŭ mơn ƀu čă đơi ôh, ayuh hyiăng pơ anai ƀơi pơ-iă ƀơi hơjan, bơyan không phang sui mơn, lŏn tơnah kơƀah ia hiư̆m phun kyâo thâo hiam”.

Đang glai mơng sang anŏ ayong Jiao Klong, ƀơi să Ia Rsai, tơring glông Krông Pa djai 9/10, anun jing ƀu hơmâo brơi prăk ôh.

Kar kăi tui anun mơn, boh than pla glai rưng ƀơi anom wai lăng glai mông anai ƀơi Krông Pa ăt hơmâo aset biă. Ơi Vũ Đức Dân - Khua anom wai lăng glai rưng pơgang ayuh hyiăng Ia Rsai, tơring glông Krông Pa brơi thâo, amăng 2 thun 2019 hăng 2020, Anom bruă wai lăng glai rưng pơgang ayuh hyiăng Ia Rsai, tơring glông Krông Pa hơmâo pla 60 ha đang keo klai, samơ̆ truh ră anai, kơnong hơmâo giăm 7 ha phun hơdip. Tui hăng ơi Dân, hơmâo lu tơhnal ba truh bruă pla glai rưng ƀơi lŏn glai arăng ngă hmua ƀu dưi ngă tui hăng tơlơi kiăng. Amăng anun, bruă phun ñu lĕ anih pla ataih đơi, lŏn tơnah ƀu hiam; hrơi pla adai pơ-iă kơtang đơi, ƀu hơmâo ia hơjan. Hrŏm hăng anun lĕ yua prăk pioh pla glai aset, ƀu djơ̆ hăng bruă juăt pla mơng mơnuih ƀon sang:

“Kơ hơdră djru tuh pơ plai, kơnuk kơna ta aka ƀu pơhlôm tui tơlơi kiăng mơng ană plơi ôh. Sa tal pla kyâo glai, rông phun pla juăt ñu 4 thun. Prăk pioh pla 1 ha amăng 1 tal pla lĕ rơbêh 35 klăk. Lơ̆m anun, kơnuk kơna ta djru brơi 2 klăk 500 rơbâo đôč. Neh met wa pơ anai lêng kơ mơnuih djuai ƀiă, tơlơi hơdip tơnap soh. Ană plơi ƀu hơmâo prăk pla, wai lăng ôh. Mơng anun yơh ngă phun djai tui amăng ƀrư̆”.

Mrô glai rưng pla amăng thun 2017-2021 ƀơi lu anih či Gia Lai glăk hơdip, samơ̆ ƀu hiam ôh.

Tui hăng Jơnum min khua pơ ala mơnuih ƀon sang tơring čar Gia Lai, hrŏm hăng tơring glông Krông Pa, boh than krăp lăng ƀơi tơring glông Phú Thiện, Čư̆ Pưh hai ăt hnun mơn. Jơnum min pơ ala mơnuih ƀon sang tơring čar Gia Lai kiăng Kơnuk kơna ta lăng glăi, pơsir brơi bruă djru prăk kăk hăng mơnuih ƀon sang laih anun anom bruă pla glai, đah mơng pla glai klă hloh, kiăng bruă pơjing mơtah glai ba glăi boh than sit nik kơ mơnuih ƀon sang./.

Nguyễn Thảo: Čih - Siu H’Mai: Pơblang