VOV4.Jarai - Ƀơi mông jơnum mă tơlơi pơhing pơphun tlam lơ 3/10, ƀơi Hà Nội, Kơ-iăng khua ding jum bruă hmua hăng pơđĭ kyar ƀon lan ơi Phùng Đức Tiến pơsit, amra pơƀut ĕp hơdră gir hơmâo 50 klai dolar Mi prăk sĭ mơdrô gơnam mơng hmua, kyâo, akan hơdang amăng thun anai. Amăng 9 blan rơgao, bruă ngă hmua đĭ tui, gơnam mơng hmua ba sĭ pơ dêh čar tač rơngiao đĭ tui. Bơhmu hăng tơđar thun hlâo, prăk sĭ mơdrô gơnam mơng hmua, kyâo akan hơdang amăng 9 blan đĭ 15,2%, him lăng hơmâo năng ai 40,8 klai dolar Mi, gơnam mơng hmua kyâo akan hơdang lêng đĭ soh. Truh ră anai hơmâo 7 mơta gơnam hơmâo nua sĭ kơ čar rơngiao rơbêh 2 klai dolar Mi. Kiăng hơmâo prăk pơhrui glăi 50 klai dolar Mi amăng thun anai, amăng hơdôm blan rơnuč thun, Ding jum bruă hmua hăng pơđĭ kyar ƀon lan amra pơtrut pơplih glăi bruă mă, pơđĭ tui gơnam pơhrui glăi, pơkra gơnam klă, tŭ yua, pơtô brơi hơdôm boh tơring, biă ñu tơring čar hơmâo pơdai braih lu, rông hlô, akan hơdang hơmâo akŏ bruă ba sĭ gơnam lăp djơ̆ hăng anih sĭ mơdrô kiăng.

Siu H’Mai: Pơblang