Grŭp wai lăng glai pơgang hlôm hlâo Thạch Nham dưi hmâo tơring čar Kon Tum jao wai lăng pơgang 32.000 ektar glai raih tui 5 bôh să gah tơring glông Kon Plông giăm hăng tơring glông Sơn Hà, Sơn Tây, Ba Tơ, tơring čar Quảng Ngãi hăng tơring glông Nam Trà My, tơring čar Quảng Nam. Anih anom prong laih anun ha mơguai hăng 2 tơring čar ataih truh rơbêh kơ 50km anun bruă pơgang glai klô bưp lu tơlơi tơnap. Ơi Phan Quốc Vũ, Khua Grŭp wai lăng pơgang glai pơgang hlôm hlâo Thạch Nham, brơi thâo bruă gum hrŏm kơjăp hăng hơdôm bôh anom pô glai ƀơi Quảng Ngãi hăng Quảng Nam lĕ jơlan pơsir klă pioh pơgang glăi tŭ yua:

“Anom pok pơhai hơdră gum hrŏm hăng hơdôm bôh anom pô glai gơyut hăng rim tal hmâo kơčăo bruă hyu tir, pel ĕp. Kơplah wah dua bơnah ăt juăt pơplih nao rai lăi pơthâo hăng pơphun hơdôm tal hyu tir huĕt ĕp ƀơi kual guai ăt kah hăng lăi pơhing pơsur mơnuih ƀôn sang ƀơi kual giăm guai. Rơgao kơ bruă gum hrŏm kơplah wah hơdôm bôh anom giăm guai lĕ lŏn glai dưi wai lăng pơgang klă”.

Hơdôm blah glai kual giăm guai kơplah wah tơring glông Ia H’Drai, tơring čar Kon Tum hăng tơring glông Ia Grai hăng Čư̆ Pah, tơring čar Gia Lai lĕ anih hang tơngia gah mă kyâo ƀu djơ̆ phiăn hăng čuh glai ngă đang hmua. Biă ñu ƀơi kual dơnao ia pơkĕ apui lơtrik Sê San 3A hăng Sê San 4, ƀing dŏp mă kyâo mă tŭ jơlan ia krông dŭ kyâo, rim wot bơnah Kon Tum hyu kiăo mă lĕ đuăi hơdai nao gah Gia Lai hăng kơđai glăi. Mơ̆ng thun 2018, lom pơkă bruă gum hrŏm amăng wai lăng, pơgang glai klô hăng wai lăng glai kyâo ƀơi kual guai 2 bôh tơring čar Kon Tum hăng Gia Lai dưi kĭ pơkôl, hơdôm khul dua bơnah gum hrŏm wai lăng, pơgang glai anun tơlơi ngă soh plai ƀiă. Ơi Nguyễn Tiến Dũng, Kơ-iăng Khua Jơnum min mơnuih ƀôn sang tơring glông Ia H’Drai, brơi thâo:

“Bruă lăi pơthâo nao rai tơlơi pơhing ăt kah hăng gum hrŏm hyu tir huĕt mă ƀơi kual guai kơplah wah hơdôm khul wai lăng glai hăng 2 bôh tơring glông gah tơring čar Gia Lai dưi đing nao yôm kiăng kơ plai ƀiă bruă ngă soh truh kông ngăn glai hmâo ngă tui ba glăi bôh tơhnal klă. Rơgao rim thun tơlơi ngă soh ăt plai ƀiă lăp yap ba mơn. Truh ră anai ƀơi kual giăm guai mơ̆ng tơring glông hăng hơdôm bôh tơring glông gah tơring čar Gia Lai pơtŏng sit lĕ ƀu dô̆ hmâo anih hang tơngia gah ngă soh phiăn glai klô dong tah”.

Tơring čar Kon Tum hmâo guai hăng hơdôm bôh tơring čar Quảng Nam, Quảng Ngãi, Gia Lai abih bang ataih rơbêh kơ 440 km. Ngă tui tơlơi pơkă gum hrŏm, 5 thun rơgao khul pơgang glai hơdôm bôh tơring čar hmâo pơphun hơdôm rơbâo tal hyu tir kual glai ha mơguai. Mơ̆ng anun ƀuh 370 mơta tơlơi ngă soh phiăn glai klô, pơsir ba nao phăt kơđi rơbêh kơ 30 mơta tơlơi, pơhrui glăi giăm truh 1.000m3 kyâo djop mơta... Ơi Nguyễn Văn Nam, Khua Anom wai lăng glai kyâo tơring čar Kon Tum, brơi thâo, bruă gum hrŏm pơgang glai kual giăm ha mơguai jai hrơi jai sit nik, ba glăi bôh tŭ yua:

“Anom pô glai kual ha mơguai amăng bruă gum hrŏm wai lăng pơgang glai pơhlôm sit nik. Juăt lăng tui lăi pơthâo nao rai tơlơi pơhing, hmâo bruă gum hrŏm pơphun ngă tui klă bruă wai lăng pơgang glai ƀơi hơdôm kual ha mơguai tui rơwang anih anom hmâo pơkă wai lăng. Pơgăn hmao tlôn tơlơi ngă soh gah glai klô, sua mă lŏn glai kyâo, mă kyâo, blơi sĭ, dŭ pơgiăng kyâo glai ƀu djơ̆ phiăn, biă ñu amăng hơdôm hrơi pơdơi lơphet, hrơi tết”.

Tơring čar Kon Tum ră anai hmâo rơbêh kơ 616.000 ektar glai, amăng anun abih bang kah hăng glai hơđăp, rơnoh gôm lŏn mơ̆ng tơring čar rơbêh kơ 63% lu hloh kual Dap Kơdư. Tơring čar dô̆ lu lŏn glai hơđăp hăng mrô kyâo glai lu, lu mơta ra mơnong, lu djuai hlô, rok tok kyâo pơtâo yôm. Kơnang kơ gơgrong hlâo, gum hrŏm klă kơplah wah hơdôm khul pơgang glai hăng hơdôm bôh tơring čar ha mơguai, Kon Tum glăk djă pioh ia mơtah glai klô kơ lu blah glai klô, pơgang glai hlô ƀơi anăp ayuh hyiăng pơplih sat, ăt lĕ djă pioh jơlan hơdip kơ plơi pla djuai ania ƀiă ƀơi anai./.