Sang anŏ ơi Y Thêm dŏ amăng să Ea Kpam, tơring glông Čư̆ M’gar, tơring čar Dak Lak glăk rông 16 drơi rơmô. Tui tơlơi juăt sui laih, rơmô arăng juăt rông prưh gah rơngiao. Samơ̆ giăm anai, yua anih prưn rông gah rơngiao anet tui yua anun rĭm mơguah ơi Y Thêm amra ba rơmô nao prưh ƀơi tơdron kiăo, truh tlam nao wang glăi krư̆ amăng war. Amăng bơyan ƀu hơmâo rơk, sang anŏ nao yuă rơk pla hăng blơi mơng pơkŏn kiăng kơ čem rơmô. Ơi Y Thêm brơi thâo, mơng hrơi pơkra war, rơmô hơmâo rông klă ƀiă, war lêng pơhlôm agaih rơnăk soh.

“Kơbao, rơmô krư̆ amăng war lêng pơhlôm brơi agaih. Hlâo adih arăng rai giăm anai lăi ƀâo eh rơmô, kơbao biă mă. Ră anai huăi dong tah, yua sang anŏ gơmơi lêng kơ rơmet pơagaih eh rơmô kơbao”.

Ơi Phạm Doãn Thắng, mă bruă ƀơi anom bruă wai lăng hlô rông să Ea Kpam, tơring glông Čư̆ M’gar, tơring čar Dak Lak brơi thâo, hlâo adih, amăng să hơmâo lu mơnuih rông rơmô kơbao prưh gah rơngiao, truh tlam wang glăi krư̆ gah gŭ krum. Bruă anai ngă ƀâo biă mă, bơdjơ̆ nao tơlơi suaih pral dong. Hrŏm hăng anun, rĭm wŏt ƀuh klin kmar lar hyu ƀơi hlô rông, bruă pơgang tơnap tap biă mă. Yua anun, gong gai ƀôn lan, hơdôm gơnong bruă hơmâo pơtô pơblang, pơsur neh met wa pơkra drông war kiăng rông brơi kơ klă hloh.

“Gưl khul grup pơtô pơbang hăng gưl gong gai ƀon lan hơmâo djru brơi bruă man pơkra drông war. Hơdôm thun anai khul hlăk ai djru brơi bruă man pơkra drông war. Ră anai rơmô kơbao prưh gah rơngiao aset tui yơh, ră anai tơhrơi prưh lui, tlam wang glăi krư̆ amăng war. Ană plơi pla ăt pla rơk pioh čem amăng bơyan hơjan”.

Tui ơi Nguyễn Quang Đức, khua anom bruă wai lăng rông hlô hăng pơjrao brơi hlô rông tơring glông Čư̆ M’gar, tơring čar Dak Lak brơi thâo, đơ đam tơring glông ră anai hơmâo rơbêh 14.000 drơi rơmô. Amăng anun, kơnong sa anih rông rơmô pơƀut ha anih hăng rơbêh 100 drơi, dŏ glăi rông raih daih amăng plơi pla. Tơdơi kơ hơdôm thun hyu pơtô pơblang, pơtrut pơsur, ră anai neh met wa thâo rông klă ƀiă, ba glăi tŭ yua amăng djop mơta.

“Mơng bruă rông hlô amăng war tui anai amra pơhlôm pơgang klin kman, mơnuih rông dưi wai lăng klă hlô rông. Gah anom bruă pơjrao hlô rông amra wai lăng amăng bruă tlâ̆o pơgang brơi kơ klă hăng kơnuk kơna amra wai lăng djop hlô rông brơi klă ƀiă dong”.

Dak Lak ră anai hơmâo abih tih rơmô kơbao giăm 280 rơbâo drơi. Tơdơi kơ hơdôm thun hyu pơtô pơblang, pơtrut pơsur, neh met wa hơmâo pơplih, hrăm nao rai mơng rông prưh gah rơngiao hơdai nao krư̆ amăng war ƀudah prưh gah rơngiao rah krư̆ rah. Yua anun, hrŏm hăng bruă pơhlôm brơi gơnam ƀong, agaih rơnăk, pơgang klin kman klă, bruă rông hlô ăt jai hrơi pơplih phrâo, ba glăi tŭ yua amăng bơwih ƀong huă brơi mơnuih rông hlô mơnong./.