VOV4.Jarai-Việt Nam hơmâo hơdôm gơnam sĭ mơdrô Fine Robusta kơphê jơman phara jar kmar bơni, samơ̆ ăt hơmâo mơnuih dơnong ngă bruă hna kơphê rơgơi pioh ba gơnam sĭ mơdrô dưi truh pơ lu mơnuih blơi mơñum. Anai lĕ, tơlơi lăng nao pơ anăp adih Khul kơphê Ƀuôn Ma Thuôt kiăng ƀuh amăng Tal pơplông hna kơphê Việt Nam thun 2022 hơmâo pơphun laih ƀơi Dak Lak phrâo anai.

Tal pơplông hna kơphê Việt Nam thun 2022 (Vietnam Amazing Roast Master 2022)  yua Khul kơphê Ƀuôn Ma Thuôt pơphun, jing mông hơmâo lu mơnuih ngă bruă gah kơphê amăng dêh čar ta đing nao. Yua kơ anai lĕ, tal blung a pơphun ƀơi Việt Nam hăng hơdră ngă ƀơi gưl dêh čar kiăng akŏ pơjing anih kơ lu mơnuih ngă hrom amăng bruă kơphê hăng akŏ pơjing tui khul grup hna kơphê thâo rơgơi djơ̆ lăp jar kmar, biă mă ñu hơdră hna kơphê Robusta. Mơnuih pơplông Đoàn Tuấn Nhật mơ̆ng tơring čar Lâm Đồng brơi thâo:

"Ngă hrom tal pơplông anai kâo ƀuh lu tơlơi hrăm kơ ta kiăng thâo lu hloh, tong ten. Jing mơnuih juăt hna kơphê laih, tal pơplông anai kâo ƀuh rơđah anŏ tŭ yua hiam mơ̆ng asar kơphê mơtah, kiăng thâo rơđah mơ̆ng asar kơphê anun ta hna brơi arăng mơñum jơman. Giong hna, ăt khom thâo pơkra pơjing pioh lông lăng kiăng thâo ta hna djơ̆ hă ƀudah aka. Sa čô mơnuih hna kơphê juăt laih, khom thâo krăn gơnam ta pơjing rai hlâo hăng tơdơi kơ hna tơlơi anai hơmâo amăng tơlơi tơña pơplông tal anai soh”.

Ƀing pơplông pơtong glăi asar kơphê mơtah hlâo kơ hna

Amăng 4 hrơi, mơ̆ng lơ 6 truh lơ 9/10, 35 čô mơnuih pơplông rai mơ̆ng 13 boh tơring čar amăng dêh čar pơplông hơdôm črăn, kah hăng: ĕp lăng asar kơphê mơtah; ĕp lăng măi hna kơphê, ngă juăt amơ̆I, ĕp lăng gơnam yua pơkŏn, asar kơphê či hna; hna, pơkra ming tơpung kơphê, lăi pơthâo kơphê hăng gơnam pơkra ming giong pioh mơñum. Mơnuih pơplông Nguyễn Thị Thu Hương, mơ̆ng tơring čar Dak Nông lăi, hlâo adih kơnong hna amăng apui djuh ƀudah apui yua pơkŏn tui hăng ta kiăng samơ̆ tal anai pơplông lĕ khom đing nao kơ mơnuih blơi yua, mơñum ia kơphê anun yơh khom pơđĭ hnong hiam kơphê jơman hloh Việt Nam, djơ̆ hăng anŏ juăt mơñum mơ̆ng mơnuih dêh čar Việt Nam. Yua kơ anun, ngă hrom tal pơlông anai, mơnuih hna kơphê ƀu kơnong ngă pô pioh ba hyu mơnâo ƀâo hiam, jơman mơ̆ng kơphê đôč ôh, kiăng ba brơi kơ mơnuih blơi yua mơñum ia kơphê pơtong lăng tong ten gơnam sĭ mơdrô ta hiam hă ƀô̆, kơphê ta hna ñu jơman mơ̆n thơ.

“Ră anai, kơphê mơ̆ng Việt Nam hlăk pơblih tui hiam klă hloh anŏ tŭ yua, ia jơman mơ̆ng ñu, yua kơ anun yơh tơlơi juăt mơñum kơphê mơ̆ng mơnuih blơi yua ăt dưi pơđĭ kyar rơđah rơđong mơ̆n. Gơñu kiăng mơñum ia kơphê ƀâo bơngưi, jơman laih anun hơduah ĕp lăng phun tơdŭ kơphê rơgoh hơdjă laih anun hơdôm mơta gơnam yua hna hrom kơphê…Anai yơh mông gêh găl prong pioh kâo pơblih hơdră hna dưm mơnong ƀâo bơngưi lăp djơ̆ lơ̆m pơkra ming tơpung kơphê kiăng pơđĭ tui boh tŭ yua hiam bơwih brơi kơ tuai ta blơi mơñum klă hloh”.

Ƀing pơplông pơkă lăng anŏ hlor pơ-iă apui lơ̆m dŏ hna kơphê

Tui hăng ơi Lê Đức Huy, Khua phun kông ty Simexco Dak Lak, Kơ-iăng Khua Khul kơphê Ƀuôn Ma Thuôt lăi, bruă yua kơphê, mơñum ia kơphê hơmâo mơ̆ng sui laih rơbêh 100 thun hăng anai, amăng rơwư̆ rơwang pơđĭ kyar phun kơphê ƀơi Việt Nam. Truh ră anai, Việt Nam hơmâo kiăo tui hmao kru, tơlơi thâo hơdră hna kơphê ƀơi rŏng lŏn tơnah, hơdôm boh thâo ia rơgơi hloh kơ bruă kơ-uă tơpung kơphê ba yua măi mok ia rơgơi phrâo hơmâo baih ƀơi Việt Nam.

Khă hnun, gơnam yua măi mok ăt kŏn dưi pơblih djop bruă pơhrua kơ ană mơnuih lơi, yua kơ anŏ ta lŭk hrom, hna kơphê ñu lu mơta anun khom hơmâo tơlơi thâo ia rơgơi mơ̆ng ană mơnuih mơ̆n thâo čum, thâo hrip mơnâo bâo tơpung kơphê jơman hă ƀô̆ laih anun khom hrăm djơ̆ lăp kah thâo, ngă bruă kơhnâo kơhnăk, mă yua măi mok kơ-uă tơpung kơphê samơ̆ pô ta khom thâo djơ̆ anŏ jơman hiam mơ̆ng kơphê ta pô pơjing rai, măi mok kơnong ngă bruă đôč, hnun kah ta mơ̆ng hơmâo ia kơphê jơman, hiam klă. Ơi Lê Đức Huy lăi pơtong:

"Amăng bruă pơhrui kơphê mơ̆ng ƀing ta lĕ yua mơnuih ngă hmua pô pla, ƀing ba yua pơjing gơnam sĭ mơdrô lĕ khom thâo pơđĭ rơnoh yôm anun đĭ tui. Mơnuih hna kơphê lĕ pô tŭ mă kơphê asar anai, anun yơh ăt hơduah ĕp anih sĭ mơdrô ƀu kơnong ƀing ta pơđĭ kyar anih pioh sĭ đôč ôh, wơ̆t anih kiăng blơi dơ̆ng. Ƀu djơ̆ ôh, kơnong pla pơjing, mơkra ming lu đơi kơphê lăi jơman,  ngă đĭ nua pơmă tuč rơnuč ƀu thâo mă yua ôh, kơñ ñu lok glăi  tơlơi juăt hơmâo kah hăng gơnam sĭ lu đơi, mơnuih blơi lĕ ƀiă”.

Tal pơplông hna kơphê Việt Nam ƀu kơnong pơpŭ kơ ƀing mơnuih thâo hna kơphê đôč ôh dŏ pơpŭ kơ bruă mă, anŏ yôm asar kơphê Robusta Việt Nam, juăt lăi kơphê hơdrô hmư̆ hing hloh. Anai ăt jing bruă mă, jơlan nao kiăng pơtong sit amăng dêh čar Việt Nam ƀu kơnong pla pơjing đôč ôh, dŏ jing pran jua khăp kiăng kơ bruă pơkra ming tơpung kơphê hiam jơman kiăng kơ lu mơnuih thâo yua, mơñum ia kơphê hiam jơman hloh mơ̆ng bruă pơkra ming tơpung kơphê tŭ yua.

Hương Lý VOV Dap Kơdư pô čih-Nay Jek: Pơblang